Leeds United tan Premier League a hnai zel

Mizote lungtilengtu Leeds United-in Premier League lam hawiin an ke an pen ve zel a, an mikhual Swansea City chu 2-1 a hnehin Championship table chung berah an awm. 

Leeds United-in hnehna an chan zanah Norwich City erawh an mikhualna ramah 1-3 in Preston North End lakah an tlawm a, pahnihnaah tla thlain Leeds hi a chung berah an awm phah. 

Elland Road-a inkhelah Leeds tan Pontus Jansson leh Jack Harrison ten goal khat ve ve an khung a, Oli McBurnie-a penalty chhuih luhin Swansea City a chhan zo lo. 

Leeds boss Marcelo Bielsa chuan, "Hnehna chan hi kan phu a, goal khat leka hnehna kan chang hi a mak zawk hial a ni," a ti a, goal tam zawk khung thei an nih thu a sawi. 

Championship aṭangin pa­khat­na leh pahnihna chu Premier League khel tura tling chiang ṭhin an ni a, pathumna aṭanga parukna ten hmun ruak pakhat inchuhin playoff an khel leh ṭhin. 

Leeds United hian hma an hruai chungin an hnuai chiaha awm Norwich aia an sanna hi point khat chauh a ni a, pathumna Sheffield United lamin point thum chauhin an thlau bawk. 

Championship table chung lam tibuai thei zingah West Brom leh Bristol City chu thaibo thiang lo an la ni bawk a, Leeds tan Premier League a hnai zel kan tihrualin an dinhmun hi a la him bik lo. 

Leeds hian league match 46 khelh tur awmah match 32 an khel tawh a, match 14 khelh tur la neih an nih avangin an tan fimkhur a fin thlak ang.

 

Leeds United hian kum 1992 aṭang khan 2004 thleng chu Premier League an khel a, Championship lama an tlak hnuah English top flight football-ah an kir leh tawh lo!

Kum 2006-07 season-ah phei kha chuan Championship aṭang hian an relegate a, 2009-10 season thleng kha League One an khel hial! Tunah erawh beiseina thar an nei ve leh ta a, Leeds fan-ten beiseinain hma hun an thlir mek. 

Leeds hian Premier League-a an vanglai bera chhal ngam chu 1997-2002 inkar velah khan an hmang a, hetih hunlaia an player-te hming ringawt pawh khan lung a ti leng ṭhin. 

Paul Robinson, Jimmy Floyd Hasselbaink, Lee Bowyer, Ian Harte, Harry Kewell, Alan Smith, Jonathan Woodgate, Robbie Keane, Rio Ferdinand leh Mark Viduka te hming hre lo Premier League ngaina Mizo zingah hre lo an awm kher lo ang.

 

Leeds United hi Champion­ship-a an tlak thlak hnuah pasa­rih­na aia sang an ni ngai lo a, 13-na, 14-na leh 15-na chu an din­hmun luah ṭhin dan tlangpui a ni!

Mahse, tun season ṭan dawnah khan coach atan Argentine manager tawnhriat nei ngah Marcelo Bielsa an lalut a, an club chanchina coach hlawh hnem ber nih tirin chhiah pek tur pek vek hnuah kum khatah pound maktaduai thum a hlawh. 

Pep Guardiola-a'n 'khaw­vela manager ṭha ber' tih hial khawpa a ngaihsan coach hian a match hmasa pali-ah Leeds hi hnehna a chanpui nghal vek a, Leeds manager zingah hetiang ti thei an la awm ngai lo. 

Argentina, Chile, Athletic Bilbao leh Lazio pawh lo enkawl tawh coach hian Leeds-ah hian 54.29 win percentage a nei thei a, Leeds hi Premier League a thlenpui a nih chuan a hming a thang zual ngei ang.