Sancho hliahtu Son Heung-min

Tottenham Hotspur leh Borussia Dortmund te inkhelh hmaa sawi hlawh ber chu Jadon Sancho a ni a, minute 90 an khelh zawh hnua langsar ber erawh Son Heung-min a ni thung - South Korean tlangval hian Spurs chu an mikhual lakah 3-0 inhnehna a chanpui.

Nilaini zan Champions League last 16 first leg inkhelah Tottenham tan Son-a'n goal hmahruai a khung bakah, defender Jan Vertonghen leh substitute Fernando Llorente ten an khung belh a, March 5 hian Signal Iduna Park-a second leg an khelh hunah an chesual viau a ni loh chuan quarterfinal lut turin an dinhmun a ṭha.

Wembley Stadium-a inkhelah hliam vangin Harry Kane leh Dele Alli te an la inlan thei lo a, manager Mauricio Pochettino-a'n tlarhmaah Son Heung-min leh Lucas Moura te dahin, a thlawp turin ball thiam Christian Eriksen a awm bawk.

Tlarhnung laia khel ṭhin Jan Vertonghen chu wing back atan hman niin, Belgium international hian minute 47-naah box chhunga ball hlauhawm a vawrh luh chu Son chuan boruaka zuang kang chungin chiang zetin a lo pet lut - tun season bika a goal 16-na chiah a ni.

Inkhel inhnehtawk tak a nih laia goal khungtu Son-a'n boruak a thlak danglam a, inrintawkna an neih belh phah bawk. Spurs player zinga khel ṭha bera chhal ngam Vertonghen-a'n minute 83-naah Serge Aurier thawhrah sengin goal hnihna a khung a, hun tawp hma deuhin Eriksen-a corner pet chu feet 6 leh 4 inch a sang striker  Llorente chuan a tauh lut bawk.

Germany tana World Cup final-a chakna goal khungtu Mario Gotze hoin Dortmund an thawk chhuak a, ani thlawp tur hian a sirah English rawlthar duhawm Sancho leh season thara Chelsea player ni mai tur Christian Pulisic te an awm.

Dortmund tlarhma ten ball an thiam leh chet ranna hmangin Tottenham tlarhnung an chhaih buai fo, mahse goal ven thiam Poch-a'n a naute a remkhawm fuh tlat. Frist half-a keeper Hugo Lloris-a'n Dan-Axel Zagadou tauh goal tura ngaih a dan chu ṭha tak a ni.

France international Lloris hian an lama goal shot vawi nga a hmachhawn a chingfel thei vek a, tawnhriat a ngah tawhna a hmang ṭangkai. Goal khung lo mah se Dortmund tlarhma ten theihna an neih zia hmuh turin a awm, second leg-ah malpui hliam vanga inlan thei lo captain Marco Reus a awm tawh a nih chuan result a la dang thei ang.

Stadium sak ṭhat vangin nikum nipui leh kumin thlasik bazarah player thar lei lo mah se Pochettino-a'n a neih sa a remkhawm thiam a, Dortmund lakah pawh a chhawr rim ṭhin Kieran Trippier leh Danny Rose te bench-a dah chungin ṭha takin an khel thei, goal an chhuah loh bakah tlarhnungin goal nawr kawngah tha an thawhhlawk hle.

Argentine manager Pochetino chuan, "Player theihna nei sang tak tak awmkhawmna squad ṭha tak kan nei a, ka nau ten minti hlim hle. Kan harsatna zawk chu, vawi khatah player 11 chauh an lut thei, 22 tan hmun a awm rual vek lo," tiin player thar nei lo mah se a lungawi thu a sawi.

Poch chuan inkhel chungchang sawi zawmin, "Tlarhnung ka siksawi ṭhin hi a chang chuan a fuh a, a fuh loh chang a awm bawk. Team ṭha Dortmund kan hmachhawn dawn avang khan kan ṭhat theih dan ber tura ka ngaihin kan khel a ni. A tir lamah inrintawkna hloh deuh mah ila, second half kha chu a ṭha takzet," a ti.

Dortmund tana season duhawm hmang mek Sancho-a'n beiseina sang tak nen Wembley Stadium pan mah se a duh ang result an hmu lo a, goal thum phur mah se second leg-ah an la lehthal theih a beisei thu a sawi.

Kum 18 mi Sancho chuan, "A tir lam khel ṭha mah ila hun chanve hnu lamah khan kan rilru zawng zawng kan pe lo deuhin ka hria, team ṭha zawk kan ni chunga Tottenham lamin an khung tlat kha a mak lai chu a ni. Match lehpekah chuan tihsual neih a thiang lo ang," a ti. Sancho hian English mipuite chu amaha an la hriat ngai loh thil a hmuhtir thoah a inngaih thu a sawi bawk.

Bundesliga hmahruaitu Dortmund manager Lucien Favre chuan, "A chang chuan khel ṭha viau chunga kan chak loh ṭum a awm, tun ṭuma kan match bikah kha chuan tlarhnung ven ṭhat pawimawhna a lang chiang. Holam taka ball kan hloh kan tuar a, kan goal chhuah hnuhnung ber kha ven theih a ni bawk," tiin a sawi.