Joshua hmaah Jarrell Miller ding dawn

Anthony Joshua chuan IBF, WBA leh WBO world heavyweight title a kawl lai humhim tumin Jarrell Miller a hmachhawn dawn a, boxer pahnih intawn hun tur atan hian June 1 chu ruat phawt a ni. 

Boxer rothap pahnih hi Madison Square Garden, New York-ah an inhmachhawn dawn a, Joshua chuan, "Ka rilṭam min hnem turin New York-ah ka kal dawn a, tichuan inhnawh puar turin hmun dang ka pan leh ang," a ti. 

Joshua hmaa ding tur Miller hian vawi 24 inhnek a hmachhawn tawh a, vawi 23 hnehna changin vawi khat a khingpui a inhnehtawkpui a, vawi 20 chu a hmaa dingte a knockout - world title fight erawh a la nei ngai lo a, Joshua anga boxer langsar a la hmachhawn ngai lo. 

Kum 30 mi American boxer Miller chuan, "Ka tualchaina hmun ngeia min hmachhawn tura a rawn kal hi AJ hian a tisual dawn chiang a, kut ruakin New York hi a chhuahsan dawn a ni," tiin a vaupung a bei na hle.