India U-23 squad-ah Samuel-a

March aṭanga Under 23 2020 AFC Championship qualifier khel ṭan tur India Under 23 squad-ah Mizo player Samuel Lalmuanpuia chu koh zingah a tel. 

February 13 khan India U23 squad hi puan a ni tawh a, AIFF lamin Samuel-a hming hi tarlan zingah an telh lo. Mahse, India U-23 squad thar berah chuan Samuel-a a tel tawh a, a tira Mizo panga awm chu paruk an ni dawn tihna a ni. 

Shillong Lajong captain Samuel-a bakah hian Mizo zingah Jerry Lalrinzuala, Lallianzuala Chhangte, Daniel Lalhlimpuia, Sairuatkima leh Jerry Mawihmingthanga te chu koh an ni tawh. 

India U-23 hi Pune FC leh Churchill Brothers coach hlui Derrick Pereira enkawlna hnuaiah an khel dawn a, March 2-ah Goa-ah an inkulh ṭan ang.