Man United youth coach hlui Harrison a thi

Manchester United youth coach hlui Eric Harrison chu Nilaini khan kum 81 mi niin a thi. Kum li liam ta khan 'dementia' (rilru kim lohna chi khat) a nei tih hmuhchhuah a ni a, amah hi 'Class of 92'-a  Ryan Giggs, Paul Scholes, David Beckham, Gary Neville leh Phil Neville te chher chhuaktu a ni.

Harrison hian kum 1981 khan United-ah youth team manager hna hi a thawk ṭan a, Class of 92 hma hian Mark Hughes, Norman Whiteside, Clayton Blackmore leh Graeme Hogg te a chher chhuak tawh a, kum 2008 khan English club hi a chhuahsan.

English manager hian United youth team a enkawl bakah kum li chhung  Mark Hughes  hnuaiah assistant manager hna a thawk bawk. Nikum khan Harrison hi a hnathawh ṭhat avangin British empire hnuaia chawimawina sang panga zinga hniam ber MBE pek a ni a, youth team a enkawlna aṭanga hetiang chawimawina sang a dawng thei hi a chhuanawm hle.

Manchester United manager hlui Sir Alex Ferguson chuan, "Zirtirtu a ni a, naupang hnenah duhthlan tur kawng a sial sak a, heng zawng zawng hi a thawhrimna leh inpekna aṭanga a tih a ni. A remhriatna te naupang hnenah a hlanchhawng thei a, chuvangin kan hun laia coach ropui ber zinga mi a ni," tiin a fak hle.

Sir Alex bakah United coach leh player hluiten Harrison-a an ui thu an sawi a, player ṭhahnem tak chherchhuaktu chanchin ngaihnawm tak tak an thailang bawk.