Kerala Blasters an chak chiang

Match kua zet a zawna hnehna an chan tawh loh hnuah Kerala Blasters-in harhna an chang a, Pathianni zan khan Hyderabad FC chu 5-1 ngawtin an sawp. 

Jawaharlal Nehru Stadium, Kochi-a inkhelah mikhual team-in goal an khung hmasa zawk a, Turkish Super Lig club Alanyaspor aṭanga Hyderabad zawmtu Bobo chuan goal hmahruai hi minute 14-na lekah a khung. 

Mahse, Hyderabad an lawm sual a, an goal khung chu Blasters ben harhna goal mai a ni. South Indian club tan tun season-a beisei phak lo Bartholomew Ogbeche chuan theihna sang tak a la nei reng tih pholangin si phurh a rawn sut a, Paris Saint-Germain striker hlui hian minute 74-naah an goal ngana a khung bawk. 

Season hmasaa NorthEast United tana goal 12 khungtu Ogbeche bakah hian Vlatko Drobarov, Messi Bouli leh Seityasen Singh te chuan goal khat ṭheuh an khung bawk a, 5-1 in Blasters an chak chiang hle. Blasters tan Samuel Lalmuanpuia chu bench-ah dah ni mah se khelmualah a lut lo a, Hyderabad-in bench lamah R. Laldanmawia chu an ṭhut tluantir bawk. Nizan ISL-ah Odisha FC chuan Chennaiyin FC an mikhual a, he thu buatsaih lai hian result kan hre hman lo - zaninah ISL inkhel a awm lo ang.