Wimbledon thlipuiin rawlthar a nuai tliak First round-ah Zverev leh Tsitsipas an tla

Tennis tournament upa ber Wimbledon khelh ṭan niah beisei loh result thleng a tam a, mipa singles player hlauhawm leh beiseiawm ni phak pahnih Alexander Zverev leh Stefanos Tsitsipas te chu hneh nei loin an tla nghal.

Thawhṭannni zan inkhelah seeded pakhatna leh world number 1 ni bawk Novak Djokovic erawhin Philipp Kohlschreiber chu straight sets in a hneh thung, Serbian tlangval hian Wimbledon title pangana leh Grand Slam nomawi 16-na chawi turin bul a ṭan ṭha hle.

Kum 22 mi Zverev leh Tsitsipas (20) te hi tunlai player chhuak thar beiseiawm berte zinga mi an ni a. Amaherawhchu German tlangval Zverev hian world number 124 Jiri Vesely chu 4-6, 6-3, 6-2, 7-5 in a hneh lo. Darkar pawh tling loah Tsitsipas chuan Thomas Fabbiano chu  6-4, 3-6, 6-4, 6-7 (6-8), 6-3 a hneh loin a lta ve nghal. 

Season hmasa ATP Finals champion leh seeded parukna Zverev chuan, "Inrintawkna ka nei lo, inelna neih ṭan hma khan court pawn lama boruak dang ka neih avangin thil a harsat phah tih a lang," a ti. Zverev hian kumin French Open quarterfinal a thlen kha major tournament bika a thlen san ber a ni a, major title hmasa ber la tur chuan US Open a nghah leh rih a ngai dawn a ni.

Australian Open semi-finalist Tsitsipas leh Thomas Fabbiano te an inkhel tawk a, Greek rawlthar hian set lina tie break an khelh laiin match point vawi hnih inchhanhim thei mah se a ṭangtlang zo lo. Seeded pasarihna Tsitsipas chuan, "Mipui thlawpna ka dawng ṭha a, ka lakah beiseina an nei sang em em bawk. An duh leh beisei ang result ka nei thei lo erawh a pawi ka ti hle," a ti. Roger Federer, Rafael Nadal leh Novak Djokovic te lak aṭanga zir tur an la ngah thu a sawi bawk.

Mipui 15,000 lenna Centre Court-ah champion lai Djokovic inkhel en turin fans an khat vek a, world number 1 hian darkar hnih leh minute thum chhung lekin Philipp Kohlschreiber chu 6-3, 7-5, 6-3 in a hneh - second round lamah chuan Malek Jaziri hnehtu Denis Kudla a hmachhawn leh ang.

Wimbledon vawi li champion tawh Djokovic chuan, "Centre Court-a inkhelh hi chu a boruak a danglam ṭhin. Ka khingpui kha grass-ah chuan a hlauhawm tih ka hria, chu bakah match hmasa ber hi chu a harsat ṭhin avangin awlsam taka chak kha ka inring bik lo," a ti.

Inkhel dangah Grand Slam vawi thum champion tawh Stan Wawrinka chuan Ruben Bemelmans chu 6-3, 6-2, 6-2 in a hneh a, seeded 10-na Karen Khachanov pawhin South Korean tlangval Kwon Soon-woo chu 7-6 (8-6), 6-4, 4-6, 7-5 in a hneh ve bawk.

Ken Rosewall (1975) hnua Wimbledon khel upa ber, kum 40 mi Ivo Karlovic chuan Andrea Arnaboldi chu 6-4, 6-4, 7-6 (7-4) in a hneh. Karlovic hian Tsitsipas hnehtu Thomas Fabbiano a hmachhawn leh ang. Seeded palina Kevin Anderson chuan 6-3, 6-4, 6-2 in Pierre-Hugues Herbert a hneh, Canadian rawlthar Felix Auger-Aliassime, 2016 finalist Milos Raonic, Feliciano Lopez leh Ugo Humbert te pawhin an khingpui ṭheuh hnein second round an inhlangkai ve bawk.