Hello China!! -Benitez

Newcastle United-a chhuahsan hnu lawkah Rafael Benitez chuan Chinese club Dalian Yifang a zawm daih. Kum khatah pound maktaduai 12 a hlawh ang. 

Spanish manager hian Chinese Super League club-ah hian engtik hun chhung atan nge contract a ziah tarlan a ni lo a, South Korean coach Choi Kang-hee a thlak. Kum 59 mi manager chuan, "Zinkawng thui tak ka zawh hnuah chona thar nen bul kan ṭan leh ta. Dalian Yifang nen he zinkawng kan ṭan thei hi ka lawm takzet a ni," a ti. 

Khawvela coach hlawh-tling ber pawla chhal ngam Benitez hian Valencia, Liverpool, Inter Milan, Napoli leh Real Madrid pawh a lo enkawl tawh a, La Liga leh Champions League nomawi pawh a lo chawi tawh. Magpies thuneitute nen Premier League-a cham zel turin inbiakna nei mah se beisei angin an inrem thei lo a, "Kan hmathlir a in ang lo a ni," tiin Newcastle United hi a chhuahsan.