Chelsea-in a nghetin Kovacic an lalut

Season hman zawh taka loan-a Chelsea tana khel Mateo Kovacic chuan a nghetin London club hi a zawm a, Blues hian a man zat atan pound maktaduai 40 an inseng. 

Kovacic hian Stam-ford Bridge-ah kum nga chhung khel turin contract a ziak a, season hman zawh takah khan Europa League nomawi a chawipui. Chelsea hi January 2020 thleng transfer-a bazar thei lo turin hrem an ni mek a, Kovacic an lak theih chhan erawh hrem an nih hmaa inremna an lo ziah fel hman vang a ni. 

Season hmasaa Chelsea-in loan-a Kovacic an lakluh dawn khan, "Blues hian a ngheta Kovacic an lalut duh a nih chuan June 30, 2019 hmain pound maktaduai 40-in an lalut thei ang," tih an ziak tel. He contract an ziah lai hian Chelsea hi hrem an la ni lo a, hei vang hian Blues hian Croatian midfielder hi a nghetin an lakluh theih phah a ni. 

Kovacic hian season hman zawh takah khan Premier League match 32 a khel a, coach Maurizio Sarri chuan England midfielder Ross Bark-ley nen a inluh chhawk tir ṭhin. Chelsea hian hrem an nihna hi ngaihtuah ṭhat turin infiamna khawvela thuneitu sang ber Court of Arbitration for Sport-ah an thlen a, hrem an nihna hi hlih theih a la ni.