India-in Bangladesh hnehin semifinal an lut
India chuan Thawhlehni khan Bangladesh chu run 28-in an hneh a, Australia hnungzuiin Cricket World Cup semifinal an lut. Tigers erawh Sri Lanka, South Africa, West Indies leh Afghanistan te nen beisei tur an nei tawh lo.
Semifinal hmunruak pahnih hi nimina England leh New Zealand inkhel result-in thui tak a nghawng dawn. A sang pali hnuai lama awm zingah panganaa awm Pakistan chiahin knockout stage luh beiseina an nei tawh a ni.
'Hitman' Rohit
India-in kum 2011-a World Cup an champion ṭum khan kum 24 mi Rohit Sharma chu koh tel a ni a, lunghnur takin twitter-ah, "WC Squad ka tel ve ta lo hi pawi ka ti takzet. Hun hrehawm hi kalsanin hmalam ka pan a ṭul. Chutihrualin ka kalkawng zawh mek hi nasa takin a bahlah phah a ni," tiin a ziak.
Kum riat a ral leh chuan kum 32 mi Rohit Sharma chu thawhrimna hmangin Men in Blue player pawimawh ber zinga mi a ni tawh a, Bangladesh an hneh ṭum hian century a siam. Rohit hian World Cup khelh mekah century vawi li a siam der tawh a, Sri Lanka captain hlui Kumar Sangakkara nen chiah WC vawi khata century vawi li siam thei an awm.
Kum 87 mi Charulata
India leh Bangladesh inkhel laia player ni si lo langsar zet chu India ṭan tura thawk chhuak pitar kum 87 mi Charulata Patel a ni a, inkhelh banah pawh captain Virat Kohli leh man of the match Rohit Sharma ten an pan nghal chat.
Journalist Mazher Arshad chuan, "Charulata hi World Cup hmasa ber khelh a nihin kum 43 mi a ni tawh a, cricketer ṭhahnem tak a hmu nachungin a thlirna aṭang chuan Virat Kohli chu batsman ṭha ber a ni. Ka thlirna ve thungah chuan amah hi fan of the tournament," tiin a ziak. England captain hlui Michael Vaughan pawhin TV-in Charulata a la fuh chu 'Picture of the World Cup' tiin a sawi ve bawk.
Virat Kohli pawh a ngawi thei lo, India captain chuan, "Kan fan zawng zawng a bik takin Charulata Patel chungah lawmthu kan sawi. Kum 87 mi a ni a, fan ka hmuh tawh zingah chuan inpe ber a ni ang. Kum te chu number chauh a ni a, inpekna tak tak nen chuan thil engkim hi a theih zel. A malsawmna dawngin kan khelh leh tur atan pawh kan inpeih e," tiin a sawi.