Federer leh Nadal an tlang

Roger Federer-a'n Wimbledon match hmasa berah set hloh mah se hnehna a chang let thei a, player sawi hlawh Rafael Nadal chuan hnehna a chang ve bawk. French Open finalist Dominic Thiem erawh rawlthar ṭha dangte hnung zuiin a tla nghal.

Grass court inelna lianah hian inelna neih ṭan niah Stefanos Tsitsipas leh Alexander Zverev te an tla tawh bawk a, ni hnih niah Thiem a tlak leh tak avangin kum 1990 hnu lama piang player, ranking sang 10-a tel phak zingah Karen Khachanov chiah dam a awm ta.

Thawhlehni zan Centre Court-ah season dang ang bawkin Roger Federer-a'n lawm a hlawh a, seeded pathumna hian Lloyd Harris lakah set hloh hmasa mah se 3-6, 6-1, 6-2, 6-2 in hnehna a chang, a vawi kua nan All England Club-a nomawi chawi turin bul a ṭan ṭha hle.

Kum 22 mi Harris hian tun hmain grass court bikah hnehna a la chang ngai lo. A khingpui Federer erawh player dang zawng chunga leng a ni nachungin world number 86 Harris hian a tlangpui thuin 130mph vel bawrin a service thei a, kum 2010 hnua a vawi khat nan Swiss star-in Wimbledon first round-ah set a hloh phah hial.

Grand Slam vawi 20 champion tawh Federer chuan, "A ngai bawk sawi nawn a ngai, inelna liana match hmasa ber hi chu a awlsam ngai lo. Set a lak kha chuan hlauhthawnna min siamsak hman, amaherawhchu ka ball vuak a fuh chinah erawh ka dinhmun a nghetin tihsual ka nei tlem bawk," a ti.

Rafael Nadal hi world number 2 ni mah se seeded pathumna pek a ni a, Spanish tlangval hian Wimbledon seeding a sawisel bakah Nick Kyrgios nen inhmachhawn thei an nih avangin a chanchinin sawi a hlawh - Australian tlangval nen hian an inhmachhawn ngei dawn e.

Grand Slam vawi 18 champion tawh Nadal hian Japanese tlangval Yuichi Sugita chu 6-3, 6-1, 6-3 in a hneh a, inkhel dangah Kyrgios chuan darkar thum leh minute 26 chhungin a hnampui Jordan Thompson chu 7-6 (7-4), 3-6, 7-6 (12-10), 0-6, 6-1 in a hneh ve thung.

Nadal leh Kyrgios te hi second round-ah an inhmachhawn dawn a, kumin kumtir lama an intawn tawhna chu sawi chhuah thar a ni. February thla a khelh Mexican Open-ah Nadal hi a chak lo a, a dinhmun a ṭhat tawh hnuah Kyrgios hian duhdah takin a service khum vel a ni.

Spanish star Nadal chuan, "Khingpuite zahna nei lo," tiin Kyrgios a sawisel a, Australian player pawhin ṭawngkam dengkhawng takin Nadal hi a bei zui bawk. Tennis court chhungah an intawng leh dawn a, second round chauh la ni mah se mipui ngaihven hlawh tur a ni ang.

Seeded pangana Dominic Thiem-a'n a ṭhiante mangchhia a kalsan thei bik lo. Austrian tlangval hi Sam Querrey lakah 6-7 (4-7), 7-6 (7-1), 6-3, 6-0 in a chak lo. American Querrey hian nidang ang bawkin a service neih ṭhat a chhawr 

ṭangkai a, vawi 21 ngawt aces a vaw chhuak.

Kum 2017 Wimbledon semifinalist Querrey hian Andrey Rublev leh Cristian Garin te inkhela chak zawk a hmachhawn leh ang, ball a vuak nat bakah a service a ṭhat avangin grass court-ah chuan player langsar dang pawh hneh thei tur a ni ang.

Tennis player langsar Federer, Nadal leh Novak Djokovic te nek chhuak thei tawh tura beisei Thiem, Tsitsipas leh Zverev ten Wimbledon-ah hneh an nei lo vek a, an zingah Grand Slam nomawi chawi thei an la awm loh avangin an 'hun' chu a la inher chhuak mai dawn lo niin a ngaih theih.