Messi leh Argentina pet chhuaktu Brazil

Brazil chuan nimin zing khan Gabriel Jesus leh Roberto Firmino te goal hmangin Argentina 2-0 in an hneh a, player ropui Lionel Messi chu ram tan a ropui leh thei ta rih lo - world champion vawi hnih ni tawh hi Copa America semifinal aṭanga pet chhuah an ni.

Mineirao Stadium-ah 2014 World Cup semifinal khan Brazil hi Germany lakah 7-1 in an mualpho a, zak leh zawr taka an kunna khelmualah ngei an elpui Argentina hneha Copa America final an lut thei hi an lawmna belhchhahtu a ni ang - Chile leh Peru inkhela chak zawk nen July 8-ah nomawi an inchuh ang.

Brazil coach Tite-a'n tlarhmaah Gabriel Jesus leh Roberto Firmino te a inkawptir a, a tisual lo. Premier League star pahnih hian goal an khung bakah an khung tur an insiamsak tawn ve ve a ni.

Minute 19-naah Firmino-a'n box chhunga a ball chan chu goal-ah pet mai loin, a laia vengtu nei loa ding Jesus tan a siamsak. Manchester City striker hian harsatna nei loin hnai tak aṭangin a khung. Second half minute 71-ah Brazil hian na takin an nawr let thut a, goal hmahruai khungtu Jesus-a'n Argentina defender pahnih a paltlang hnuah Liverpool forward tana nuamsa taka khung turin a siamsak ve thung a ni.

Argentina striker Sergio Aguero-a'n Man City tana a khelhpui Jesus goal khung sut theihna hun a nei a, hnai tak aṭanga a tauh chu goal tura ngaih ni mah se goal bar a per hlauh - match hmasa lama goal a khung leh assist a neih angin a vannei nawn tawh lo.

Goal an phurh hnuah Messi pawhin hun ṭha a nei. Barcelona captain hian box sir lama a ball chan chu kawh takin a pet thut a, keeper Alisson Becker-a'n dang hman lo mah se goal ban a per, a per let a ran em avangin Messi-a'n duh angin a pet zui thei tawh lo a ni.

Liverpool keeper Alisson-a'n Messi freekick pet goal chung sir kil zeta kal chu ṭha takin a dansak bawk. Tun Copa America khelh laia goal la chhuah lo Brazil lakah Argentina-in hun ṭha insiam hnem mah se a hmawr an bawk thei lo.

Lionel Messi-a'n Barcelona tan nomawi 29 zet a chawi tawh a, Catalan club hi hlawhtlin theihna kawng hrang hrangah chuan a hlawhtlinpui tawh bakah mimal chawimawina pawh a hui hnem tawh hle.

Mahse, Messi hian famkim lohna a nei. An ram Argentina hi 2008 Olympics gold medal a lakpui bak chu hlawhtlinna a la chanpui lo, ram tan match 135 a khelh aṭanga goal 68 a khung chu ṭhahnem tham hle mah se hlawhtlinna chhiar nan a tawk zo lo.

Kum 32 mi Messi chuan, "Sawiselna leh sawi chhiatna chauh ni loin zah pawh kan phu ve tho, a chhan chu kan theihtawpin kan khel a ni. Player ṭha leh hmabak êng tak tak nei an tam a, anni nen hian engtik niah emaw chuan hlawhtlinna kan la chan theih ka beisei," tiin a sawi. Nakkumah Copa America hi Argentina leh Colombia ten an inthlen ṭawm ang.

Argentina captain hian World Cup final a khelh ṭumin Germany an ngam lo a, Copa America final vawi hnih an luh tawhah Chile an ngam lo ve ve. Messi hian an ram nomawi a la chawipui lo a, mi ṭhahnem takin khawvel footballer piang tawha ṭha ber ang hialah chhal mah se a famkim bik lo.

Brazil hian Tite kaihhruaina hnuaiah match 42 an khelh tawhah vawi hnih chiah chak loh an la nei. Tun Copa America bikah hian fans lam beisei angin an khel hmuhnawm tawk lo. Amaherawhchu, an duh leh mamawh ber 'hnehna' an chan zel avangin sawisel hleihtheih an ni lo.

Kum 58 mi Tite chuan, "Inkhelh hma khan Lionel Messi chu player ropui leh danglam bik, midang chunga leng a nihzia ka sawi. Mahse, keini chuan khami dan dan kha kan hria a ni. Kan mamawh zat goal kan khung a, fak phu khawpin tlarhnung an ding khawng leh bawk," a ti.

A tlarhma fak zuiin Tite chuan, "Gabriel hi chu a beidawng ve ngai lo, team insiksawi vangin inelna tir lamah a bul ṭantu zingah tel lo mah se a hnual phah lo. Khelmual chhunga a luh tawh chuan min tibeidawng ngai lo, goal zawna vawi 50 pet tura ka tih chuan vawi 51 a pet mai ang.

"Argentina lakah Firmino pawhin a hna a tlin, season duhawm hmang zo hlim a nih ang ngeiin kan tan pawh hun ṭha a rawn herchhuahpui mek a ni. Player zawng zawngin fak an phu, chutihrualin tun ṭumah chuan a hma a awm pahnih an ṭha zual," tiin a sawi.