Mangṭha England; Morgan i mawi chuang e!

England boss Phil Neville-a'n, "Semifinal-a chak lo zawk tumahin an hre reng ngai lo," tiin inkhelh hmain a sawi a, a sawi ang ngeiin an zinkawng chu thaireh a ni a, hriatreng tlak nomawi an hlawh dawn ta lo. 

Thawhlehni zan khan Hmeichhe World Cup semifinal-ah England leh USA an intawng a, 2-1 in Lionesses an tlawm. World champion nih an beiseina chu mangṭha a ngai ta rih a, USA-in champion turin kawng dik an zawh zel.

Semifinal boruak sangah football hmuhnawmna pho chhuak tura thil thleng ṭhin ang zawng zawng chu a thleng kim vek - goal, offside vanga goal pawm loh, penalty hlah leh celebration sawi zui hlawh tak thlengin!

USA tan winger Christen Press leh striker hmelṭha sawi hlawh Alex Morgan ten goal khat ve ve an khung a, England tan Ellen White chuan goal khat khung ve mah se Steph Houghton chuan penalty a hlah - England tan a pawi vawng vawng. 

England boss Phil Neville-a'n thutlukna a siam sual a, quarterfinal thlenga a hlawhtlinpui 4-2-3-1 hmang loin 4-4-2 a rawn hmang a, an attack tak tak chuan 4-2-4 an hmang ber niin a lang hial. 

Hei vang tak hian midfield-ah USA-in hmun awl an ngah phah a, minute 10-na lekah Press chuan US tan goal a rawn khung nghal - American hmeichhe team hian tun inelnaah hian inkhelh apiangin minute 12 hmain goal an 

la khung vek!

England an zuai phah lo. Goal an chhuah aṭanga minute kuanaah Ellen White chuan si phurh sutna goal a rawn khung a, England an phur sawt. Mahse, Alex Morgan chuan minute 31-naah a rawn tauh lut ve leh a, first half-ah 2-1 in inkhel a tawp. 

Lionesses hian a nihna takah chuan first half-a goal hnih chiah an chhuah hi an vannei -  Rose Lavelle chuan US tan vawi hnih ngawt chance ṭha a khawhral a, a ke 'hmui' ni a ni lo. 

Lionesses hian tun inelna ṭan a nih hma hian USA-ah  invitational tournament SheBelieves Cup khelin an champion a, World Cup group stage-ah Scotland, Argentina leh Japan hnehin last 16 an lut bawk. 

Knockout round-ah pawh an la ropui fu - Cameroon (last 16) leh Norway (quarterfinal) chu 3-0 ve vea hnehin semifinal an lut a, USA hmaah meuh erawh England an nihna a lang thei lo. Lionesses ṭantuten an vanduaina an sawi duh a nih chuan sawi tur a awm. White-in second half-ah an si phurh a sut niin a hria a, mah se video assistant referee (VAR) hmanga ennawn a nih hnuah offside vangin pawm a ni lo. 

England chhuanvawr White hian VAR hmang vekin penalty hlawh chhuak leh zui mah se an chhawr thei chuang lo - Houghton chuan goal-ah a chantir thei lo a, 2-1 in an tlawm. England hian tun inelnaah vawi li penalty an hlawh chhuak a, vawi khat chiah an pet goal. 

USA-in World Cup apiangin semifinal an la lut ziah a, tunah chuan a vawi nga nan final an khel dawn ta hial - final an luh nan hian Alex Morgan chu player thawhhlawk a ni a, semifinal hi a piancham niah tak an khel bawk. 

Kum 30 mi striker hian tun inelnaah goal ruk a khung tawh a, English striker Ellen White nen an goal khung zat a in ang - final a la khelh dawn avangin top scorer nih 'chance' a nei sang hle. Morgan hian goal a khung zawhin thingpui in ang takin a goal a lawm a, hei hian sawi zui a hlawh - hei hi thingpui lama hriat hlawh England a tih elnaah tam takin an ngai a, Boston Tea Party hriatreng nana a tia ngai an awm bawk. (*1773 khan Tea Act chuan British East India company chu chhiah chawi loa America-a thingpui hralh a phal sak a, American tam takin a dodalna hun an huaihawt a, hei hi Boston Tea Party tih a ni a,  American Revolution inṭanna ang hiala sawi a ni.) 

Mahse, USA tan match 168 a khelha goal 107 khung thei striker chuan, "Megan Rapinoe pawhin tih dan hrang hrangin a goal khung a lawm ṭhin a, tuman a chhan an zawt ngai lo. Kei ka nih avangin min zawt ta luai luai mai a ni," a ti thung.