Atletico-in Joao Felix £113m-in lalut

Atletico Madrid chuan Portugal forward Joao Felix chu euro maktaduai 126 (£113m) in Benfica aṭangin an lalut a, khawvela player manto pangana a ni.

Portuguese club hian Atletico-in player leina man hi instalment-a an pek tur thu an tichiang a, kum 19 mi forward man hi a release clause euro maktaduai 120 aiin euro maktaduai rukin a tam zawk.

Joao Felix aia player manto chu Neymar, Kylian Mbappe, Philippe Coutinho leh Ousmane Dembele te chiah an awm. Portugal international hian Atletico-ah hian kum sarih atan contract a ziak.

Kum 19 mi Felix hian nikum August thla khan Benfica tana a match hmasa ber a khel ve chauh a, season hman zawh takah khan match 43-a inlanah goal 20 khungin assist 11 a nei. Porto aṭanga inzir chhuak Felix hian Europa League-ah April khan Eintracht Frankfurt lakah hattrick a siam a, he inelnaa hattrick siam thei naupang ber a ni. 

Felix hi kum 2015 khan a cher em avangin FC Porto-in an chhuah zalen a, an club hmelma hi a zawm. Benfica reserve team tana inlan thei naupang ber a ni a, September 2016-ah a inlan nghal. 

Nikum August thla khan Boavista nen an inkhelh ṭumin senior team tan a inlan ṭan a, hemi zawh match-a Sporting Lisbon an hmachhawn ṭumin bench aṭanga lutin goal a khung. Manager hlui Rui Vitoria hnuaiah khelhna hun a chang tam tawk lo a, manager thar Bruno Lage hnuaiah rawn vul chhoin manager thar hnuaia an match hmasa berah goal hnih a khung nghal.

Swansea manager hlui Carlos Carvalhal chuan, "Bernardo Silva hi khawvela player ṭha ber zinga mi a ni a, amaherawhchu kum 19 mi a nih chuan Felix-a theihna ang hi a nei lo. Hei hian kan player sawi chungchang hi a sawifiahin ka hria," tiin Felix chuan hmabak êng tak a neih thu a sawi.

Felix hi a theihna a san avangin Atletico-in an lak hma hian Manchester United leh Manchester City te nen pawh sawi zawm an ni.

Atletico Madrid-in Felix man atana sum an sen huai chhan hi Antoine Griezmann leh player pawimawh dangin club an chhuahsan dawn vang a ni a. Griezmann hian club thar a zawm tur thu a tichiang a, buyout clause pawh pound maktaduai 120 zet niin Barcelona zawm tura ngaih a ni.

French forward bakah hian Lucas Hernandez chuan euro maktaduai 80(£68m) in Bayern Munich a zawm a, Luciano Vietto pawhin euro maktaduai 7.5-in Sporting Lisbon a pan. Manchester City-in an player manto ber ni turin Atletico aṭangin pound maktaduai 62.8-in Rodri an lalut dawn bawk.

Diego Simeone hoten player ṭha chan mah se an inthuam ṭha. Felix hma hian Real Madrid aṭangin Marcos Llorente (€30m), Porto aṭangin Brazilian defender Felipe (€20m) leh Mexican midfielder Hector Herrera (free) te an la tawh.

Season thar atan Zinedine Zidane hoin Real Madrid an intuai thar a, Lionel Messi telna Barcelona-in an team ṭha sa belh turin player ṭha an lalut ve bawk. Atletico Madrid hian Spanish football thununtu club pahnih hi elphak an tum dawn a ni.