A hunah England an harh chhuak
Cricket World Cup-ah England-in Nilaini khan run 119-in New Zealand an sawp a, Australia leh India hnungzuiin semifinal an lut. Black Caps-in semifinal ticket la nei lo mah se vawiin tlai dar 3:00-a Pakistan leh Bangladesh inkhelh zawhah chuan knockout stage an luh ngei a rinawm.
Inelna thlengtu England hi pathumna an ni chiang a, karleh Ningani hian Edgbaston-ah India emaw Australia an hmachhawn dawn. Semifinal pakhat zawk hi Old Trafford Cricket Ground-ah July 9 khian league round hmahruaitu leh palinain an khel ang.
Go Jonny Go
England-in Sri Lanka an hneh loh ṭumin Jonny Bairstow chu a ball hmachhawn hmasa berah a thi nghal a, cricket ṭawngkama 'golden duck' hi chu batsman tan chuan zahthlak tawp a tling. Australia an hneh loh ṭum pawhin Bairstow hian ball 39-ah run 27 chauh a siam.
Inelna thlengtu hian Pakistan, Sri Lanka leh Australia an hneh loh avangin tla thei dinhmunah an ding a, an hmaah India leh New Zealand an awm bawk avangin ziaktu ṭhenkhatin 'tla tlukin' an ziak hman. Amaherawhchu Jonny Bairstow-a'n hartharhna a chang a, India an hneh ṭumin run 111 a vaw chhuak. New Zealand an hneh ṭumah pawh hian kum 29 mi Jonny bawk hi 'hero' a ni a, run 106 a siam.
England batsman dang Jason Roy (60) leh captain Eoin Morgan (42) te an chet ṭhat bawk avangin run 305 an siam a, chutihrualin over tawp lamah vaw ṭha deuh phei se chuan hei aia tam tlin thei tur an ni a. Jonny leh Roy te bul
ṭan ṭhat zarah dinhmun ṭhaah an ding.
England an chungnung
England batsman-te ang thoin bowler-te pawh an che ṭha a, Chris Woakes leh Jofra Archer ten wicket khat ve ve la nghalin New Zealand hian opener pahnih Martin Guptill leh Henry Nicholls te an chan hian over 5.2-ah run 14 chiah an la siam.
Captain Kane Williamson (27), Ross Taylor (28) leh Tom Latham (57) te hoin New Zealand dinhmun tiṭha hret mah se England target set sak a san hret avangin an talbuai. Mark Wood chuan run 34 chauh pein wicket thum a la a, New Zealand hi over 45-ah run 186 chauh siamin an thi vek.
Toss a pawimawh
England hian tun World Cup-ah bat hmasak an thlanin an la chak vek a, captain hlui Michael Vaughan pawhin toss a ngai pawimawh hle. Vaughan chuan, "England hi inkhelh hmabak pahnihah toss-a an chak a nih chuan an champion ngei ka ring. An vawm hmasak a, a umtu zawka an ṭang a nih chuan pressure hnuaiah rin ngam an la harsa," tiin an ram chu champion thei an nih thu a sawi.
England captain Eoin Morgan chuan, "Kan khel ṭha chungchuang a, a bik takin opener-te an che ṭha. Jonny-a'n century a siam kha kan chakna chhan ber a ni," tiin a sawi.
July 3, Nilaini
ENGLAND bt NEW ZELAND
England run 119 in an chak
Toss-ah England an chak a, bat hmasak an thlang
Venue: Emirates Riverside, Chester-le-Street
England 305/8 (50)
Jonny Bairstow 106 (99)
Jason Roy 60 (61)
Eoin Morgan 42 (40)
Jimmy Neesham 41/2
Matt Henry 54/2
Trent Boult 56/2
New Zealand 186 all out (44.5)
Tom Latham 57 (65)
Ross Taylor 28 (42)
Kane Williamson 27 (40)
Mark Wood 34/3
Ben Stokes 10/1
Jofra Archer 17/1