Champion lai USA-in Gold Cup final lut

CONCACAF Gold Cup semi­final-ah USA chuan nimin zing khan Jamaica 3-1 a hnehin final an lut. Thawhṭanni zing dar 6:30-ah Haiti hnehtu Mexico nen nomawi an inchuh ang.

Nissan Stadium, Tennessee-a inkhelah hian United States tan Christian Pulisic-a'n goal hnih khungin Weston McKennie-a'n goal khat a khung ve bawk. Jamaica hian si hnih an phur hnuah Shamar Nicholson goal hmangin beiseina thar nei mah se inkhel result a danglam phah lo.

Final-a US leh Mexico inkhel tur hi record nei ṭha pahnih an nih avangin dream final anga chhal theih a ni a. Chutihrualin inelna thlengtu United States hian Mexico hi final-ah vawi thum an hneh tawh lo. An khelmual Soldier Field, Chicago-ah an record ṭha lo hi siamṭhat an tum ang.