Premier League hnuaiah WSL awm hnai
Football Association hnuaia inelna Women's Super League chu Premier League kutah a lut hnai. Thla hmasa khan Premier League club-te chuan WSL dinhmun zirchiang turin inlungrual takin inremna an lo nei tawh a, thla ruk liam ta chhung khan Premier League leh FA chuan inbiakna an lo kalpui reng tawh a ni.
Kum 2011 khan WSL hi din a ni a, season thar aṭang chuan Europe-a hmeichhe league zinga full-time professional competition awmchhun a ni a, 2019-20 season aṭang chuan team 12-in inelna an hmachhawn ang. WSL-ah hian season thar aṭang chuan Manchester United leh Tottenham Hotspur hmeichhe team pawh an inlan dawn a, England-a hmeichhe league division sang pahniha club 22 zinga 13 chu Premier League club ta an ni.
England hmeichhe football team-in tun hnaiah result ṭha an neih fo avangin hmeichhe football nasa takin a ṭhang a, semifinal-a USA an hneh lo lai kha mi maktaduai 11.7 zetin an en - kumina British television-a pekchhuahin entu a ngah ber ṭum a ni hial.
Hei mai hi a ni lo. Women's Super League hi season thar aṭang chuan Barclays nen an thawkdun tawh dawn a, an inremna hi pound maktaduai 10 zet a tling.