Chelsea manager thar Super Frankie

Frank Lampard hi tu nge a nih hrilh nawn kan ngai lo. Chelsea fan-ten an hrechiang lehzual ang - tunah chuan an coach a ni ta a, khelmual chhunga an lawmna thlen ṭhintu kha kut phar chungin an lawmlut leh ta. 

Super Frankie tia hriat lar midfielder hian kum thum chhung atan contract a ziak a, a hlawh tur zat hi kum khatah pound maktaduai li bawr vel niin an tarlang. Kum 41 mi manager hian a chet ṭhat dan a zirin pawisa a dawn belh ṭhin bawk ang. 

Lampard chuan, "Chelsea-ah head coach ni tura ka lo kir thei hi ka lawm takzet a ni," a ti a, a lawm tluk zetin Chelsea fans an lawm - English manager hian Juventus pana kal ta Maurizio Sarri a thlak.

Chelsea tan match 648-a goal 211 khungtu chuan rim taka hnathawk tura Stamford Bridge-a kir a nih thu a sawi. Lampard chuan, "Mi zawng zawngin he club ka hmangaihzia an hria a, kan hun tawn dun hlutzia pawh min hriatpui a ni. 

"Mahse, season thar atana inpuahchah hi ka tum ber a ni. He hmunah hian rim taka hna thawka, hlawhtlinna tam zawk chharpui turin ka lokal - bul ṭan thuai thuai ka chak tawh takzet a ni," a ti a, a phur hle. Lampard hian player a nih laiin Chelsea tan nomawi liantham 11 zet a chawipui hman a, coach nichungin nomawi engzat nge a chawi dawn, tih chu thil hriat chakawm a ni ta. 

Roman Abramovich-a'n 2003-a Chelsea a lei hnuah manager nghet pakua zet an lo nei tawh a, Lampard hi sawmna a ni. Blues director Marina Granovskaia chuan, "Khawvela coach chawrno zinga talent nei ṭha ber pawl a ni," tiin an coach thar a fak. 

Granovskaia chuan sawi zawmin, "Chelsea head coach ni tura Frank kan nei let thei hi kan lawm takzet. Ani hi chuan he club hi engkimah a hrechiang em em a ni," a ti. Derby County aṭanga Blues pantu Lampard hian Championship club-a a thachhang dawltu assistant manager Jody Morris leh first-team coach Chris Jones-te a chhawm a, Blues tana a khelhpui ṭhin Petr Cech chu thla hmasa khan technical advisor-ah ruat a ni bawk. 

Chelsea hian pound maktaduai 58 man Christian Pulisic nei thar mah se hrem avangin transfer bazar-ah Frank Lampard a che rih thei dawn lo. A hna hmasa tur chu a neihsa hmanga team ṭha tak din a ni ang. 

Mahse, Blues hian loan-a chhuahtir player engemawzat an nei a, Everton-a an kaltir Kurt Zouma leh Aston Villa-in Premier League an kai nana player pawimawh Tammy Abraham te chu langsar zual an ni - Derby-ah khan loan vekin Blues player pahnih Mason Mount leh Fikayo Tomori a chhawr ṭangkai viau bawk. 

Lampard chuan, "Player naupang leh upa pawh an inchawhpawlh mawi tawk em em a, academy-a kan hnathawh thlir phei chuan ka phur takzet a ni," tiin player langsar lo pawh chhawr tura a inpeih thu a sawi. 

Lampard hian kum 2001 khan West Ham aṭangin Chelsea hi a pan a, hetih hunlaia a man zat hi pound maktaduai 11 a ni. Blues tan legend a ni zui a, nomawi chawi theih ang chu a chawi kim. Champions League, Europa League, Premier League (3), FA Cup (4) leh League Cup (2)-ah te nomawi a chawi vek a, Blues-ah hian season 10 chhung chu a zawnin goal 10 aia tam a khung ziah. 

Chelsea tana goal 211 a khung chu Blues record a ni a, ani aia Chelsea tana khung hnem thei an la awm lo. June 2014 khan Chelsea a chhuahsan a, Manchester City leh New York City-ah a khel hman. Lampard chuan, "Kum 15 chhunga he club hnathawh avang khan Chelsea-ah hi chuan beiseina a sang fo ang. Mahse, chu chu player ang pawha nuam ti taka ka lo hmachhawn tawh kha a ni," a ti - a inringtawk hle. 

Premier League lo inring rawh. Chelsea fapa rangkachak Super Frank Lampard a lo kir e.