India tan Jeremy leh Jacob

Commonwealth Weight-lifting Championship chu July 6-15 chhung hian Apia, Samoa-ah neih a ni dawn a, he hunah hian India aiawhin Mizo rawlthar pahnih Jeremy Lalrinnunga leh Jacob Vanlaltluanga te an inlan dawn.

India Weightlifting Team te chuan tukin zing hian inelna neihna tur hmun an pan dawn a, Govt. Complex rawlthar Jeremy pawhin training a neihna hmun Melbourne, Australia aṭangin Apia a pan ve bawk ang. Commonwealth Champion­ship-ah hian Jeremy hi 67kg huangah a inlan dawn a, senior huanga khel tur ni mah se a kumin a la phak avangin junior leh youth inelna pawh a hmachhawn ang. Jeremy hi Commonwealth Junior leh Youth snatch, clean & jerk leh total record siam mektu a ni. 

Youth Olympic gold medalist Jeremy Lalrinnunga hi April thla a neih Asian Senior Championship-ah khan snatch 134kg, clean & jerk 16 kg, total 297kg zoin 9-na a ni a. Mahse, a record hi World Youth, Asian Youth, Commonwealth Junior leh Youth bakah India Senior, Junior leh Youth record a ni tel bawk a ni.

Jacob Vanlaltluanga hi 61kg huangah Commonwealth junior leh youth-ah a tel ve dawn. Jacob hi India Junior leh Youth bika gold medalist ni lai mek a ni a, inelna a hmachhawn hnuhnunga a record chu - snatch 114kg, clean & jerk 139kg, total  253kg a ni thung.