Final-a USA hmachhawn tur Netherlands

Stade de Lyon, France-a Hmeichhe World Cup semifinal entu mipui 48,452 zetin penalty hmuh inbeisei mah se Netherlands midfielder Jackie Groenen chuan minute 99-naah goal a rawn khung a, Sweden players leh fan-te thinlung a keh chhia. 

Netherlands-in 1-0 in Sweden an hneh a, an ram chanchina a vawi khat nan World Cup final an lut - a vawi nga nana World Cup final lut USA nen Pathianni zan dar 8:30-ah final an khel ang. Inrinni zan dar 8:30-ah pathumna inchuh inkhel a awm dawn a, USA ngam lotu England leh Sweden ten bronze an inchuh dawn.    

Netherlands tan goalkeeper Sari van Veenendaal chu 'hero' a ni a, Arsenal goalkeeper hlui hian goal ngei tura ngaih chu vawi thum ngawt a dang. 

Sweden goalkeeper Hedvig Lindahl hming lam hmaih a thiang bik lo. Kum 36 mi tawnhriat ngah Chelsea player hian Shanice van de Sanden shot ṭha zet chu a tlukpuia ṭhain a dang a, extra time khelh a ṭul phah. 

Minute 90 chhunga team pahnihin goal an khung loh avangin extra time khelh a ni a, Netherlands an vannei ta zawk. Manchester United midfielder Groenen chuan minute 99-naah goal a rawn khung a, Sweden-in a chhanletna tur an nei lo. 

Euro 2017 quarterfinal-ah khan Netherlands hian Sweden hi an lo pet tla tawh a, phuba lakna remchang an neih an chhawr thei lo. Mahse, Sweden hian last 16 an luh hnuah team ṭha Canada leh Germany an hneh zui avangin hma hun an nei êng hle.

Hmeichhe World Cup thlirin Netherlands zinkawng chu a ngaihnawm ber pawl a ni - 2015 khan a vawi khat nan World Cup an khel ve chauh a, an vawi hnih khelhnaah final an lut nghal!

Kum 2009 khan a vawi khat nan Euro an khel ve chauh a, semifinal an lut nghal tawh. Euro an  vawi thum khelhna 2017-ah an champion a, World Cup nomawi an chawi leh thei ang em - a hriat thuai dawn.