Australia nge India pakhatna ni dawn?

Cricket World Cup semifinal khel tur a hriat ta a, inhmachhawn tur erawh a la chiang lo. Vawiin tlai dar 3:00 hian India leh Sri Lanka an inkhel ang a, Pathianni zan dar 6:00-ah Australia leh South Africa te an inkhel leh bawk ang.

Virat Kohli leh a hote hian hnehna an chang a nih chuan champion Aussies-in semifinal-a an khingpui tur duh an thlang thei dawn. Australia hian an match hnuhnung bera Proteas an hneh chuan July 9, Thawhlehni hian New Zealand an hmachhawn ang a, an chak loh erawh chuan inelna thlengtu England nen July 11, Ninganiah final khel tur an zawng ang.

Headingley Cricket Ground-ah beisei tur nei tawh lo West Indies leh Afghanistan te an inkhel a, ṭhumvawra vannei Windies-in bat hmasak an thlang. West Indies tan Shai Hope (77) leh Evin Lewis (58) te an che ṭha a, over 50-ah run 311/6 an siam. Chak la nei lo Afghanistan tan target a sang hret a, over 50-ah run 288 siamin an thi vek. Inelna ṭan hmaa team nem bera ngaih Afghanistan-in zir belh tur an la ngah a, point an hmu lo.

India-in semifinal an lut tawh a, Sri Lanka-in beisei tur an nei tawh lo. Tun ṭum nena sawi zui theih chu 2017 ICC Champions Trophy group stage kharna a ni a, hetah pawh hian tun ṭuma an dinhmun nen a danglam lo.

Men in Blue-in bat hmasain over 50-ah run 321/6 siamin chak tura ngaih an ni a, amaherawhchu Lions-in wicket sarih dah bangin over 48.4 -ah target hi an umpha. Sri Lanka hian thawnthu hlui ziak nawn tur chuan West Indies an hneh ṭuma century siamtu Avishka Fernando a pawimawh dawn a, veteran bowler Laisth Malinga pawh a ṭangkai ang.

India tan erawh inelna thlengtu England pumpelh tur chuan chak ngei a ṭul a, final kawng awlsam zawka ngaih zawh tur chuan Sri Lanka nena an inkhel tur hi a pawimawh hle.

Champion lai Australia inelna lianah an danglam ṭhin a, match nga chak zawn leh tawhin nomawi huhim tura rinrawn an ni leh ta. Aussies hian a zawna vawi ruk chak turin Pathianni zanah South Africa hneh ngei an tum ang.

Australia hian semifinal-a an hmachhawn theih pahnih England leh New Zealand te hi league round-ah an sawp ve ve. Aussies coach Justin Langer chuan, "Inrintawkna nei turin chak zel hi kan mamawh. Thla 12 chhung hun harsa tak kan hmachhawn a, tuna kan dinhmun ṭhat tak avangin kan match hnuhnung ber ka la zam lo ang," tiin a sawi.