Juve-ah Buffon a kir

Gianluigi Buffon chuan season khat chhung Paris St-Germain tana a khelh hnuah tun hma lama a ropui tawhna Juventus-ah a kir leh ta a, Italian club tan hian kum khat daih contract a ziak.

Italy international hlui hian 2006 World Cup khan an ram a champion pui a, club lamah pawh Juventus chu Serie A nomawi pakua ngawt a lak pui tawh. Mahse, European club inelna lian ber Champions League-ah erawh a la hlawhtling lo thung.

Kum 41 mi Buffon hian Serie A match khel hnem ber AC Milan legend Paolo Maldini (647 games) record khum turin match riat chauh khelh a ngai tawh - season tharah erawh Wojciech Szczesny nen khelhna hmun an inchuh dawn avangin record thar a siam ngei dawn em tih a chiang lo.

Manager thar Maurizio Sarri kaihhruaina hnuaiah Juve hian Italy-ah chuan ro an rel leh ngei ang tih a rin theih a, forward chhuanvawr Cristiano Ronaldo an hman thiam tawh bakah Aaron Ramsey leh Adrien Rabiot te an lak belh tawh bawk avangin club lian dang tan hmachhawn an châkawm loh ang.