Kashyap leh Verma ten quarterfinal lut

India tlangval badminton khel thiam pahnih Parupalli Kashyap leh Sourabh Verma te chuan, Cana­da Open Super 100 tournament-ah an khing­pui ve ve hnehin quar­ter­final an in vaw kai.

Nimina last 16 inkhelah seeded pa­ruk­na Kashyap hian darkar khat leh minute 24 zet an inkhelh hnuah Ren Peng Bo chu 23-21, 21-23, 21-19 in a hneh. National champion ni lai Verma chuan 21-13, 15-21, 21-15 in Chinese player Sun Fei Xiang a hneh bawk. 

Indian Open semifinalist Kashyap hian a match lehpekah chuan Lucas Claerbout a hmachhawn dawn a, India tlangval pakhat zawk Verma-a'n Li Shi Feng a hmachhawn ve thung ang. Commonwealth Games champion hlui Kashyap chuan, "Inkhel hautak paltlanga quarterfinal luh chu a lawmawm, ka khelh ṭhat ṭum a nih avangin a vannei zawkah ka ṭang," a ti. Verma pawhin a khelh dana a lungawi thu a sawi ve bawk.