Nadal lakah Kyrgios a tlawm

Wimbledon inkhel ngaihven hlawh leh mipui hmuh chak ber pakhatah Rafael Nadal chuan Nick Kyrgios a hneh, Spanish tlangval hian hnehna a chan hnuah Centre Court chhunga amah ṭantute hmaah a hnehna chan chu nasa takin a lawm, hei hian inkhel chhehvel boruak thui takin a hrilhfiah.

Nilaini zan second round inkhelah Nadal hian darkar thum leh minute li chhungin 6-3, 3-6, 7-6 (7-5), 7-6 (7-3) in hnehna a chang. Grand Slam vawi 18 champion tawh hian court chhung leh pawn lama nungchang mawi lo ve tak Australian tlangval chu 'Thil Tih' hmangin tennis nun dan mawi a zirtir.

Rafael Nadal-a'n set hmasa ber a lak hnuah set hnihna a hloh a, set hnuhnung pahnihah erawh tie break hmangin hnehna a chang. All England Club-ah a vawi 50 nan hnehna a chang chiah bawk a ni. February thla khan Mexican Open-ah player pahnih hi an intawng a, hnehna changtu Kyrgios-a'n a dinhmun a ṭhat tawh hnuah - naupang ball vawtir service ang maiin  (underarm serving) a service khum a, tun ṭuma an intawn pawhin vawi hnih a tih khum. Nadal chuan, "Khingpuite zahna tlachham," tiin a lo sawisel tawh.

Wimbledon-ah an intawng leh a, second round chauh ni mah se a boruak a sang hle. Kyrgios-a'n a mize pangngai chhuahin Nadal chhaih thinrim a tum a, game la thei dinhmuna a din hnuah duhdah taka ball vuak a nei fo, chawlh laiin umpire Damien Dumusois lakah vui leh vaina a thlen nasa hle bawk.

Tennis game zahawmna vawng himtu Nadal a buai duh lo a, set hnihna a lak lawm nana boruak hnek chunga sang taka zuang chuan a ti mai mai lo tih a lantir. Spanish player hian nidangah a elpui tana hmuh nuam lo tur khawpin a chak a lawm (celebrate) ngai meuh lo - Kyrgios lakah erawh a boruak a danglam.

Season nga liam ta khan khatih hun laia kum 19 mi Kyrgios hian vawi 37 ngawt aces vaw chhuak chungin Wimbledon-ah Nadal a hneh a, kum 1992 hnu lamah world number 100 hnuai lamin world number 1 an hneh lehna hmasa ber a ni hial.

Tun ṭumah hian beiseina sang tak nen Nadal hmachhawn leh mah se a duhthusam a thamral. Amaherawhchu, Australian tlangval hian sawi zui tur thil a hnutchhiah leh tho. Net hnai taka Nadal tlan hma chu na zeta vuak per a tum! Wimbledon vawi hnih champion tawh hi racket hmangin a lo indang a, line pawnah ball a kal chhuak.

Kum 24 mi Kyrgios chuan, "Ngaihdam ka dil a ngaihna ka hre lo, point ka hmu miau a lawm. Player ropui leh hlawhtling a ni a, nomawi lian a chawi hnem bakah sum a ngah bawk. A awm khan tennis ball a lak thlak theih ka ring hial," tiin a chak loh hnuah pawh ṭawngkam a duhtui lo hle.

Tawnhriat ngah Nadal erawh a ngaihdan a dang, "Ka tan chuan a hlauhawm lo, mahse line referee leh entu mipui tan a hlauhawm. Khatianga ball i vua a nih chuan kawi lamah nge a kal i hre ngai lo ang," tiin a khingpui thil tih chu atthlak a nih thu a sawi.

Wimbledon vawi riat champion tawh Roger Federer chuan wildcard hmanga inlan Jay Clarke chu 6-1, 7-6 (7-3), 6-2 in a hneh a, 2001-a Tim Henman a ngam loh tih loh chu Swiss star hian grass court inelna lianah hian khawtual player ngam loh a la tawng lo.

Seeded pahnihna Federer chuan, "Ka tan chuan min ṭantu mipui hi an hlu ṭhin. Baseline aṭanga ball vuak harsa ka tih ṭhin pawh a ziaawm zel a, attacking game ṭha takin ka khelh chhunzawm leh theih ka beisei," a ti. Federer hian seeded 27-na Lucas Pouille a hmachhawn leh ang.

Federer leh Nadal an chak lai hian John Isner leh Marin Cilic te erawh second round paltlang zo loin an tla thung. Season hmasa semifinalist Isner hi Mikhail Kukushkin lakah 6-4, 6-7 (3-7), 4-6, 6-1, 6-4 in a chak lo. Ke hliam vanga inbuatsaihna nei loa Wimbledon kheltu Isner hian beisei a phak lo.

Kum 2017-a pahnihna Cilic pawhin beisei a phak lo, Croatian tlangval hi Joao Sousa lakah 6-4, 6-4, 6-4 in a tlawm. Tournament a tawp ruala tennis a chawlhsan tur thu sawi lawk tawhtu Marcos Baghdatis chu Matteo Berrettini a hneh loh avangin infiamna khawvela a zinkawng chu a tawp zui ve bawk.