Robben a chawl ta

Bayern Munich leh Chelsea winger hlui Arjen Robben chuan inkhelh a chawlhsan thu a puang.

Kum 35 mi Robben hian season tawp hmain Bavarians a chhuahsan tur thu a tichiang tawh a, uluk taka hmalam hun a ngaihtuah hnuah inkhelh zel a tum tawh lo. German club Bayern chuan, "A tawp tak avangin ṭap suh u, a thlen avangin lawm zawk rawh u. Robben, kan lawm e. I tan Munich-ah hmun a awm reng," tiin an thlah.

Khawvela winger hmuhnawm ber zinga mi Robben hi Lionel Messi leh Cristiano Ronaldo te nena khaikhin remchiah lo mah se footballer zunzam nei leh danglamna thlen thei 'mi bik' zinga mi a ni. Robben hi an khaw club Groningen-ah inzirin he club-ah hian a football career pawh a ṭan a, hemi hnu hian PSV Eindhoven, Chelsea, Real Madrid leh Bayern Munich-ah hming a chherin league nomawi a chawipui vek.

Chelsea pawhin Premier League leh League Cup nomawi pahnih ve ve bakah FA Cup nomawi chawipuitu Robben hi an hre reng a, London club hian an player hlui hi duhsakna an hlan. Dutch winger hian an ram Netherlands tan vawi 96 an khel a, FIFA World Cup-ah pahnihna leh pathumna a nihpui bawk. Club football bikah Robben-a hming chherna ber chu a hun tawp hmanna Bayern a ni a, German club hi Bundesliga-ah vawi riat zet champion puiin Champions League nomawi an chawi theih nan Wembley Stadium-a final khelhah chakna goal a khung.

Bayern chuan Robben hi 'Mr Wembley' tiin hminglem an pe a, German club chauh ni loin football-ah sulhnu ropui a hnutchhiah a ni.