Copa America Brazil hmaa ding tur Peru

South America ramte football hmanga inelna lian leh sang ber Copa America chu Pathianni zan dar 1:30-ah a hmawr bawkna neih a ni dawn a, inelna thlengtu Brazil leh Peru ten Maracana Stadium-ah nomawi an inchuh ang.

Ram pahnihte hi group match-ah an inhmachhawn tawh, coach Tite hnuaia khel ṭha tak Brazil lamin 5-0 in hnehna an chang. An intawn tawhna leh an player khaikhin chuan harsa lutuk loin Brazil lam hian hnehna an chang tura ngaih a ni.

Zanin dar 12:30 hian semifinal-a chak lo pahnih Argentina leh Chile ten pathumna dinhmun an inchuh dawn bawk. Beisei phak lo ram pahnih hian mualpho taka Brazil chhuahsan ai chuan pathumna ni chunga haw an thlang dawn.

Goal chhuah miah loin Brazil hian final an thleng thei a, an tlarhma an hriam bawk avangin rinkai zawk an ni hi a mak lo. Mahse, defender Alex Sandro chuan champion tur chiang an awm bik loh thu a sawi.

Copa Amercia match la khel kim vek Sandro chuan, "Match tin mai hi a danglam zel, tumah rinkai zawk an awm lo, final-ah chuan eng pawh a thleng thei," tiin a ṭawng fimkhur hle. Brazil hian a vawi kua nan champion an tum dawn a, an chak a nih chuan 2007 hnua an hlawhtlin lehna hmasa ber a ni ang.

An intawn hmasaka goal khungtu - Everton, Roberto Firmino, Casemiro leh Dani Alves te an inlan leh vek dawn a, mahse Argentina an hmachhawn ṭuma hliam tuar Willian erawh tihrawl na vangin a inlan thei dawn lo.

Peru hian tun hnai kum 44 chhunga a vawi khat nan Copa America final an khel dawn, inelna neih ṭan hma a nih kha chuan a thiam pahnih zinga an tel hi a rinawm loh. Mahse, Ricardo Gareca naute hi mumang ramah an cheng mek - harhchhuah an duh rih lo ang.

Kum 61 mi Gareca-a'n Brazil an hneh loh hnuah, "Kan nihna tak a ni lo," tiin a sawi. Quarterfinal-a Uruguay an hneh chiah kha chuan team ṭha an ngam theih thu a sawi ngam tawh a, semifinal-a champion lai Chile an petchhuah theih avangin a thusawi hi a lo thlawn lo tih a hriat theih.

Peru coach Gareca chuan, "Huaisen taka kan bei a nih chuan thil theih loh a awm bik lo. Brazil hmachhawn harsat zia leh hautak zia chu kan hria, amaherawhchu thil tih theih loh a ngaih pahnih ngawt tun hnaiah kan ti thei a ni," tiin inrintawkna an neih thu a sawi.