Atletico hmaah Chelsea fiahna

Thomas Tuchel-a hnuaiah Chelsea-in hneh loh an la tawng lo a, London club hian zanin dar 1:30 hian Atletico Madrid an hmachhawn dawn.

Blues tan La Liga hmahruaitu an hmachhawn tur hi fiahna hautak a ni dawn a, an vanneihna tur erawh Covid-19 vangin Spanish club khelmual Estadio Wanda Metropolitano-a khel loin National Arena, Bucharest-ah an an inkhel ang. 

Diego Simeone-a'n kum 2011 aṭangin Atletico Madrid a enkawl ṭan a, hemi hnu hian Chelsea-in manager nghet pakua an nei tawh. Tuchel pawh hi a che ṭha lo a nih chuan Roman Abramovich leh a hote hian an ban hreh lo ang.

Tun dinmunah erawh Tuchel hi a la che ṭha a, thla 18 chhung chauh contract a ziak. German manager Tuchel chuan, "Contract rei lo hi ka tan buaina a awm lo. Kum li leh a chanve pawh contract nei ila, an lawm lo a nih chuan min ban tho ang," tiin a sawi.

Chelsea hian nipui bazarah player thar lei nan pound maktaduai 220 an hmang a, result ṭha an neih leh si loh avangin Frank Lampard an ban. Tuchel-a'n thuneihna a chelh hnuah player thar chhawr kher loin club-a awm sa player-te nen rualkhai takin khelhna hmun a pe vek.

German manager hnuaiah Blues-in vawi sarih khel tawhin vawi nga an chak a, vawi hnih an inhnehtawk. Club thar tana goal khung harsat Timo Werner pawhin Tuchel-a hnuaiah goal a khung tawh a, Lampard-a chhuah hnuah Mason Mount a la ṭha reng. Chutihrualin Blues hian Atletico lakah fiahna tak tak an hmachhawn dawn chauh a, an match hnuhnung berah Southampton nen an inhnehtawk tih hriat a ṭha bawk.

Atletico hi La Liga hmahruaitu an ni ringawt lo a, season liam taa Liverpool pet chhuaktu an ni. Diego Simeone hote hian Europe inelna sang berah hian sulhnu ṭha tak an nei a, final pawh vawi hnih hial an thleng.

Chutihrualin Luis Suarez-a telna Atletico hi match hnuhnung paliah vawi khat chiah an chak a, an match hnuhnung berah Levante an hneh lo. Simeone hote hian zanin inkhel pawimawh hian Chelsea hnehin phur tharna neih an tum dawn a ni.