AFC tan player thar Abishek

Aizawl FC chuan vawiin tlai 2:00 hian Salt Lake Stadium-ah Real Kashmir an hmachhawn dawn. Mizo club tan hian player thar Nepal international Abhishek Rijal a inlan dawn.

Nimin tlai press conference-ah AFC coach Yan Law chuan, "Abhishek Rijal hian quarantine hun a hmang zo a, kan team-a khel nghal turin a ṭha tawk. Real Kashmir lakah hian a inlan a beisei theih ang," tiin player thar hi a chhawr nghal tur thu a sawi.

Mizo club hian an match hnuhnung berah inkhel thunun chungin Mohammedan SC 3-0 in an hneh a, table-ah panganaah an awm mek. Champion besei tur chuan an chunga awm Real Kashmir hi an hneh ngei a ṭul dawn. 

Law chuan, "Real Kashmir hi team ṭha tak an ni a, kan hneh erawh a ngai thung. Champion tumin ṭan kan la a, champion turin kan ṭha tawk bawkin ka hria," tiin a sawi. 

Aizawl FC hian Nigerian forward Princewill Emeka an chhuahtir a, Ugandan defender Richard Kassaga a inhliam bawk avangin captain Alfred Kemah Jaryan chiah foreigner an kawl.

Tun ṭumah erawh Abhishek Rijal-a'n a rawn belh dawn a, foreigner pahnih an nei tawh ang.

Real Kashmir hi an match hnuhnung berah RoundGlass Punjab nen an inhnehtawk a, Afghan defender Zohib Islam Amiri-a'n red card a hmuh avangin Mizo club a hmachhawn thei dawn lo. 

Snow Leopards tan Mizo tlangval Sena Ralte-in hmun pawimawh a chang a, head coach David Robertson fapa Mason Robertson chu team innghahna a ni a, Neroca lama hattrick siamtu Lukman Adefemi pawh ven uluk a ṭul ang.