Arsenal kiang ru, Man City an lo kal e

Pep Guardiola nauten Arsenal laka goal khung turin second 77 bak an mamawh lo. Ni e, minute hnih pawh an inkhelh tlin hmain Raheem Sterling chuan a tauh lut - Manchester City hi Premier League hmahruaitu niin, an elpui Manchester United aiin point 10 zetin an sangfal ta.

Gunners mualah 1-0 in Man City an chak a, inelna hrang hrangah a zawnin match 18 teh meuh an chak ta. League match bikah pawh vawi 13 an chak zawnna chiah niin, December 15 aṭanga point la hloh lo City dang thei an awm lo.

Pathianni zan Emirates Stadium a inkhelah goal kan hmu hma, tun hnaia khel ṭha thei tak Riyad Mahrez-a'n mual sir lama a ball chan chu muangchangin a insiamrem pui a, ngaihtuahna fim a hman hnuah awmze nei takin box chhungah a thawn lut.

Mahrez-a ball vawrh hi 6ft 2in a sang Rob Holding leh 6ft 4in a sang Pablo Mari te channa lai a fuh tawk lo, defender palian pahnih karah hian 5 ft 7 in chauha sang Sterling chuan a duhtawkin ball a tauh thei a, keeper Bernd Leno tan dan hman a ni lo.

Striker Sergio Aguero leh Gabriel Jesus te chhawr lo mah se Kevin de Bruyne a awm leh tawh, Belgium international hi tlarhma laiah dah niin, midfielder Ilkay Gundogan nen an intlan thelh kual vel chu Gunners tlarhnung tan a luhai thlak thei hle.

Germany international Gundogan-a'n a goal khung kaltluang lai chhawm nun tum viau mah se Leno a paltlang thei lo a, defender ball thiam Joao Cancelo pawhin hun ṭha nei ve mah se goal ban hrulah a kal liam bawk.

Leeds United laka hattrick siamtu Pierre-Emerick Aubameyang chu Ruben Dias leh John Stones ten an chep ral a, defender Kieran Tierney-a'n hla deuh tak aṭanga keeper Ederson a enchin bak chu chawlhlawk hmain goal hlauh an nei meuh lo.

Mual sira awm Nicolas Pepe-a'n a man zat (pound maktaduai 72) a la pet chhuak thei lo chhunzawm, rawlthar Bukayo Saka huaisenna chu Arsenal innghahna a ni. English rawlthar hian ball a keng ngam a, counter attack aṭanga an nawr pawhin Saka hi an thapui a ni.

Kum 19 mi Saka khel ṭha mah se season kal laia clean sheet vawi 23 nei tawh Man City tlarhnung su hawng turin a hriam tawk lo, thlawpna a dawng ṭha tawk lo bawk, mual ding lama a ṭangkai ṭhin ang khan vei lamah chuan a ke a hmui rih lo niin a lang.

Arsenal tan man City laka goal khung loh hi thil zahthlak a ni lo mai thei. Amaherawhchu, an elpui team an chhaih buai phak meuh lo a, goal an phurh hnuah pawh sut tuma nawr ai chuan a venhim lam an la ngaih pawimawh angaih avangin team pahnih dinhmun a la inthlau hle.

Man City manager Guardiola chuan, "Khawvel pum thlirin club lian tam takin point an hloh nasa, chutiang boruak karah tluang taka kan kal thei hi a mak ta ti zawk hial. A nihna takah chuan hetianga chak rei hi chu ka beisei ngam loh thil a ni," a ti. Si khat faia chak chu a pawimawh thu a sawi bawk.

Pep-a assistant coach ni ṭhin, tuna Arsenal manager ni ta Mikel Arteta chuan, "Player ṭha tak tak, khelh dan phung inang si lo kha ṭha takin an remkhawm a, a tirah tihsual kan neih bawk avangin a harsa a ni," a ti. Defender palian kara forward lian lo zawkin a tauh lut chu an thiam loh a ni tih a sawi tel bawk a ni.

Gunners hian Ningani zanah Europa League-ah Benfica an mikhual dawn a, kar tawpah Leicester City an lenchilh zui dawn. City pawhin Champions League-ah Borussia Monchengladbach an tlawn dawn, chumi hnuah West Ham an mikhual leh ang.