Barca-in hun ṭha an chhawr lo

Atletico Madrid chak loh hnuah Barcelona-in La Liga hmahruaitu nena an inkar sawr zimna remchang nei mah se club tenau Cadiz lakah point khat bak an hlawh chhuak zo lo a, 1-1 in an ṭin. 

Champions League-a Paris Saint-Germain laka mualpho hlim Barcelona hian hnehna chang se La Liga champion an sawi ri ngam ve leh tur a ni a, mahse, an chak zawk loh miau avangin fan-te rilru hliam sa an la tuam dam thei lo. 

Nou Camp-a inkhelah hian Barcelona tan Lionel Messi chuan penalty hmangin goal hmahruai a khung a, Catalan club hian hei hi an chakpui mai dawn nia a lan hnuah Alex Fernandez chuan Cadiz tan minute 89-naah penalty hmang vekin a sut. 

Barcelona-in point khat bak an hlawhchhuah theih loh avangin hmahruaitu Atletico Madrid an phak lohna chu point riat a ni a, table-ah pathumna nih chhunzawmin Real Madrid chu point ngain an phak lo bawk. 

Lionel Messi-a'n Barcelona tana La Liga-a a match 506-na a khel a, La Liga-ah Barcelona tan heti zat inlan thei an la awm lo - record thar a ni. 

Messi-an a duh ang ngeiin a record hi goal nen a lawm - minute 32-na lekah Pedri chu tih tluk a nih avangin Barca hian penalty an hlawh a, Messi hian harsatna nei loin goal-ah a chantir. 

Kum 33 mi forward hian tun season-ah league match 21 khelin goal 16-a khung ta a, assist vawi nga a nei bawk - La Liga-ah a ṭhianpa, Atletico Madrid striker ni ta Luis Suárez nen top scorer an ni dun mek. 

Messi hian Barca tan league match 506 a khelh aṭang hian goal 460-a khung a, assist vawi 201-a nei. 2004-05 season khan Barca tana a league match hmasa ber a khel a, 2008-9 khan league match 31-ah goal 23-a khung - hemi hnu hian league-ah goal 23 aia tlem khunga season khar a nei tawh lo. 

Messi-a'n Barcelona tana a record goal nen a lawm a, point thum nen a lawm chhunzawm ngei dawn niin a lang hman - mahse, hun tawp nan minute khat chauh a awm tawh tihin Cadiz duhthusam a thleng. 

Barca defender Clement Lenglet chuan  Ruben Sobrino a tih tluk avangin penalty-a chawi a, Alex Fernandez chuan Cadiz si phurh sutna goal ni turin a khung - Barcelona tan si phurh sutna hun a awm tawh lo. 

Catalan club hian 81% ball changa vawi 20 zet shot an nei chungin an vanneih zan a ni lo a, Cadiz goalkeeper Jeremias Ledesma-a'n Barca a zuam laklawh - kum 28 mi keeper hian December 5, 2020-a 2-1 a Barca an hneh ṭum khan a lo khel ṭha tawh hle. 

Pathianni zan inkhelah pawh Ledesma hian Messi leh Antoine Griezmann-te khung tur nia lang chu a dansak a, Frenkie de Jong leh Pedri-te goal khung pawmsak an ni lo a,  Ousmane Dembele-an khel ṭha viau mah se goal-a keng tel lo bawk. 

Barca-in point thum hmuh theihna tur team lakah point hnih an hloh a, minute 89-naa goal chhuah an nih bawk avangin a uiawm lehzual. 

Barcelona boss Ronald Koeman chuan, "Ka lawm lo takzet zet a, PSG laka kan tlawm ai khan ka lawm lo zawk hial mai thei a ni," a ti. 

Dutch coach chuan sawi zawmin, "League-ah kan kal tluang em em a, buaina pawh kan nei tam lo. Tun ang game hi chu keini ang team chuan kan chhawr tur a ni a, mahse, kan chhawr miau si lo a ni," a ti a, lungawi a harsat. 

Barcelona hian Cadiz an inhnehtawkpui hma hian league match sarih chhung chu a zawnin hnehna an chang tawh a, nizana Osasuna nena inkhel Sevilla-in hnehna an chan chuan pathumnaah chhoin Barca an tlanpel ang - he thu buatsaih lai hian result kan hre hman lo thung.