An mualah PSG an tlawm

Paris St-Germain tan Ligue 1 nomawi an kawl lai chu awlsam taka humhim ngawt theih a ni dawn ta lo. Mauricio Pochettino naute hi an mikhual AS Monaco lakah 2-0 in an tlawm.

League match 26 an khelh chinah PSG-in point 54 hmuin pathumna dinhmun an luah a, an chungah hmahruaitu Lille (58 points) leh Lyon (55) an awm - French champion tan hmabak a hautak chho dawn hle.

Monaco tan Sofiane Diop chuan inkhel ṭan aṭanga minute rukna lekah goal hmahruai a tauh lut, mualneitu PSG lamin ball chang tamin inkhel thunun mah se goal an nei thei lo. Second half-ah Guillermo Maripan chuan Monaco goal hnihna khung lehin rinkai lo zawk an chak.

Neymar tel loa inlan PSG hian 'target' zawnah vawi khat chauh an pet thei a, an inkhelhna hmun hi Parc des Princes a nih bawk si avangin mualphona lian tak a tling. Niko Kovac enkawl Monaco tan erawh result duhthusam a ni thung.

Monaco manager Kovac chuan, "PSG kha team ṭha tak an ni a, hnehna chang tur khan minute 90 chhung ṭha takin kan theihtawp tak meuh kan chhuah a ni. Team ṭha hmachhawn ni mah ila goal khung theihna remchang siamsak loa kan khel thei khan min ti lawm," tiin a sawi.

Thawhrim an ngaih thu sawiin PSG manager Poch chuan, "A nihna takah chuan an ball chang kan um nasa hle, goal kan chhuah hma kha a pawi, a hnu lama kan insiamṭha thei ta chuang lo kha a pawi lai chu a ni. Hmabak tam tak kan la nei tih a lang," a ti.

PSG hian kar hmasa lawk khan Champions League-ah Barcelona 4-1 in an hneh thei a, league-ah erawh an beisei ang result an nei rih lo. Spanish club lian nen last 16 second leg an khelh hmain league match pathum khelh tur an la nei, insiamṭhat hman an tum ang.