BWF-in Olympic qualifer hun pawtsei

Badminton World Federation (BWF) chuan Tokyo Olympic khelh tumte tan thu lawmawm a chhuah. Olympic qualifier khelh hun chhung chu June 15 thleng atan pawhsei a ni tih an sawi chiang.

Covid-19 vangin season hmasa aṭangin badminton inelna a mumal thei lo. Kuminah pawh tournament ṭhenkhat chu khel thei tawh mah se khelh vek theih a la ni lo, Malaysia Open chu April thla tira khelh tur ni mah se May thla tawpa khelh turin an sawn.

Singapore Open pawh June 1-6 a khelh tur ni mah se thla hnih laia sawn tlai a ngai dawn, hei hian tournament dang pawh a nghawng ngei dawn tih a chiang a, player tan ranking point hmuh belh turin hun an mamawh rei dawn tihna a ni bawk.

BWF chuan thu chhuah siamin, "Malaysia Open leh Singapore Open te sawn tlai a ni a, hei hian Indonesia Masters leh Indonesia Open te pawh a nghawng dawn, dawhthei taka insiamrem a ngaih phah dawn a ni," an ti.

Olympic-ah hian ranking sang zual 16 an inlan ṭhin a, ram pakhat aṭangin singles player pahnih an inlan thei. Ruahman lawk san chuan April thla tawpa an ranking en tur a ni, mahse tunah chuan June thla thleng inelna an nei dawn tihna a ni ta zawk.

Tokyo Olympic hi July 23 aṭanga August 8 chhungin neih a ni dawn. Badminton huanga qualifier chu March thla a khelh tur Swiss Open aṭangin an chhunzawm leh ang.