Milan ngamtu Inter an fal ta

Inter Milan chuan an hmelma leh elpui ni bawk AC Milan 3-0 in an hneh a, inkhel pawimawhah hnehna an chan avang hian Serie A table-ah point liin an sang fal - Antonio Conte naute tan nomawi chawina kawng a inhawng zau ta.

Pathianni zan 'Milan Derby' boruak sang takah Inter striker Lautaro Martinez chuan goal hnih a khung a, striker palian Romelu Lukaku chuan goal thumna khung bawkin an elpui team lakah an chungnung.

Pathianni zan Serie A inkhel dangah Atalanta chuan an mikhual Napoli 4-2 a sawpin table-ah palina dinhmun an luah. Chak lo Napoli erawh pasarihnaah an tlahniam a, manager Gennaro Gattuso dinhmun a derthawng chhunzawm.

Italian club lian pahnih inkhel hi a boruak a 'hot' ṭhin hle a, tun ṭumah hian champion tum an nih avangin a pawimawh zual. 2011 April thla hnu lamah team pahnih hi table hmahruaitu leh pahnihna ni chunga an inhmachhawn lehna chiah a ni, an ṭhat lai tak tihna a ni.

Thla hmasa khan Coppa Italia quarterfinal-ah an intawng a, striker palian Zlatan Ibrahimovic hnawhchhuah niin Inter midfielder Christian Eriksen chuan chakna goal a khung, team pahnih an intiat tawk viau.

Tun ṭumah hian Ismael Bennacer leh Mario Mandzukic te an inlan thei lo a, Inter pawhin Stefano Sensi leh Arturo Vidal te chu hliam vangin an chhawr thei lo. Inkhel ṭan hmain Inter player hlui Mauro Bellugi sunna hun hman niin, a hnu lam chu indona hlirin a chhunzawm.

San Siro Stadium a inkhelah goal kan hmu hma, minute ngana lekah Lukaku siamsak chu vengtu nei lo Martinez-a'n a tauh lut. Milan lamin Ibra hmangin an sut teuh hle a, a ball tauh chu keeper Samir Handanovic chuan rang zetin a lo dansak.

Chawlhlawk hmain goal dang a luh belh lo, second half-ah Inter lamin mawi taka Milan tlarhnung an ṭhiah hnuin Martinez bawkin a hmawr a bawk, Milan midfielder Sandro Tonali khung tur chu Handanovic ṭhatzia lantirna mai a ni thung.

Inter lamin an la duhtawk mai lo, striker Lukaku-a'n hun ṭha hmasa a khawhral hnuin a tha chakna a hmang. Belgium international hian mual laihawl aṭangin chak zetin ball a tlanpui a, Milan lam box thlenga a tlan luhpui hnuah chiang zetin an goal thumna a hlap lut.

Season hmasa khan pahnihna an ni a, manager Conte-a'n atan awmzia a awm loh thu a sawi. Italian manager hian champion ngei a duh, Conte chuan, "Kan elpui lakah hnehna kan chang thei hi lawmna tur hlir a ni, ka naute ka chhuang takzet," a ti.

Milan coach Stefano Pioli chuan, "Goal khatna kha chu ven loh vanga lut a ni a, kan tihsual a ni. Goal kan chhuah hnuah khan sut theihna remchang kan insiam nual, mahse Handanovic a chet ṭhat em avangin kan paltlang thei lo," a ti a, nomawi beiseina a la bo loh thu a sawi bawk.

Nizan khan champion lai Juventus an inlan a, result kan hre hman lo. League match 15 ngawt khelh hmabak an la neih avangin nasa takin an dinhmun hi a la danglam thei dawn - tun dinhmunah chuan Inter hi champion tura rinkai ber an ni.