Duhawm taka season khartu Lianzuala
Chennaiyin FC forward Lallianzuala Chhangte chu Pathianni zan Indian Super League inkhelah hero of the match atan thlan a ni a, Lianzuala khelhna Chennaiyin hian Kerala Blasters chu 1-1 in an inhnehtawkpui.
Chennaiyin tan Fatkhulo Fatkhulloev chuan minute 10-na lekah ṭha zetin goal hmahruai a khung a, mahse, minjute 29-naah Gary Hooper chuan penalty hmangin Blasters si phurh a sut - Lianzuala'n a tawp an khar ṭha thei lo ṭhin chu an buaina a nih thu Vanglaini a hrilh tawh a, Lunglei tlangval thusawi dikna a lang.
Hetihrual hian Lianzuala erawh a khel ṭha takzet a, Lunglei FC forward hlui hian goal khung lo mah se Kerala Blasters tlarhnung chhaih mangangtu a ni - hero of the match ni chungin season a khar. Chennaiyin tana offside vanga a goal khung pawmsak loh Enes Sipovic chu minute 80-naah hnawhchhuah a ni.
Chennaiyin tan Jerry Lalrinzuala chuan inkhel bul a ṭan bawk a, season lai hawla a inhliam avanga ngai awh leh rih lo Lalchhuanmawia Fanai erawhin bench lamah hun a hmang tluan thung.
Kerala Blasters tan Lalruatthara hmuh tur a awm leh ta a, minute 90-a khel tluan. Blasters coach lailawk Ishfaq Ahmed chuan, "Lianzuala veng turin ruahmanna kan siam a, a tir lamah che ṭha mah se Lalruatthara leh Prasanth Karuthadathkuni-te khan Lianzuala dang chat turin an khel ṭha hlein ka hria," a ti.
Chennaiyin lamin league match 20 an khelh tur an khel zo ta a, point 20 neiin semifinal an lut zo lo - match 19 khel tawh Blasters hian match khat an la hmabak thung.
Pathianni zan ISL inkhel dangah FC Goa chuan 2-1 in Bengaluru FC an hneh a, season hmasaa league round hmahruaitu Goan club hian tun season ISL-ah match khat chauh khelh tur an nei tawh a, an ke lehlamin playoff an rap tawh, tiin a sawi theih bawk.
Goan club tan Igor Angulo (20 minutes) leh Redeem Tlang (23')-ten goal an khung hma a, Bengaluru tan Suresh Wangjam chuan minute 33-naah sut ṭhen mah se goal dang erawh an nei zui lo - Bangalore hian playoff an khel dawn lo tih a chiang ta bawk.
Bengaluru tan Edmund Lalrindika chu minute 87-naah bench aṭanga luhtir a ni a, Lunglei rawlthar tan danglamna thlen tur khawpin hun a awm tawh lo.