Mizoram khelh dan kan zir uluk - Meghalaya coach

Santosh Trophy-ah hian awmna bial ang zela qualifying round an khelh ṭan hi kum 2014 kha a ni a, Mizoram champion kum kha niin kumin hi hemi hnua final round an thlen zawh loh hmasak ber a ni.

Mizoram hian January thla khan Khelo India Under 21-ah gold medal an la a, nikum December thla khan BC Roy Trophy inelnaah an champion. MPL7 finalist Aizawl FC leh Chhinga Veng chuan I League leh I League 2nd Division te an khel a, Mizoram football-in hma a sawn zel niin a lang.

Amaherawhchu mahni muala Meghalaya hneh loh chunga Santosh Trophy final round an tlin loh takah chuan fuh loh lai a awm a, insiamṭhat ngai a awm tih chu a chiang a ni.

Mizoram coach Lalsangzuala Hmar chuan Under 21 player-ten a tir aṭanga training an zawm lo chu an chak lohna chhan pakhat a nih thu a sawi a, a dikna chen a awm. Hei bakah hian Mizo player ṭha awm khawmna Mizoram Police chuan All India Police Meet an hmachhawn avangin duh thlan tur player an nei tlem bawk.

Chhuanlam dang tam tak karah hmuh hmaih lo tur chu Meghalaya inpuahchahna a ṭha.

 

Inkhelh banah coach Khlain Pyrkhat Syiemnlieh chuan, "Mizoram inkhel kha uluk takin kan zir a, dead ball specialist an nei lo a, freekick emaw corner chawi kha kan hlau lo. Team ṭha an nih avangin defensive game khelh kha kan pawi ti lo a, kan tlarhnung player-te kan ringtawk. Kan tum chu set piece aṭanga khung a ni a, kan tumah kan hlawhtling," tiin Vanglaini a hrilh.

Meghalaya hian captain Brolington Warlarpih, Shillong Lajong defender hlui Samuel Shadap leh Churchill Brothers defender hlui Banpynkhrawnam Nongkhlaw te an kawl a, Mizoram laka goal an venghim thei hi a mak lo.

Santosh Trophy final round-ah hian Meghalaya bakah Delhi, Goa, Karnataka, Maharashtra, Odisha, Services leh Sikkim te an tling tawh.

Hmarchhak aiawh tur khel tur team pakhat zawk hi vawiin chawhma dar 10:00-ah Manipur leh Assam ten Lammualah an zawng dawn. Team pahnih hi an point hmuh leh an goal difference neih dan inang chiah mah se Assam hian Arunachal Pradesh lakah goal an khung tam zawk avangin final round lut turin draw a tawk.