Barca-ah Valverde cham zel dawn

La Liga champion Barcelona manager Ernesto Valverde chuan Catalan club-ah kum khat dang cham chhunzawm turin contract thar a ziak a, a ṭul dan a zirin kum khat dang pawhsei leh theih a ni bawk ang. 

Barcelona boss hian a contract thar ang chuan 2019-2020 season tawp thleng Barca hi a enkawl dawn tihna a ni a, kum khat dang a pawhsei belh leh chuan kum 2021 thleng a enkawl dawn tihna a ni. 

Kum 55 mi manager hian May 2017 khan Luis Enrique thlakin Barcelona a enkawl ṭan a, a season hmasa berah La Liga leh Copa del Rey nomawi a chawpui nghal. 

Contract thar ziak lo se chuan season tawp ruala Nou Camp chhuahsan tur coach hian Barca hi match 96 kaihruaiin vawi 65 hnehna a chanpui a, vawi 22 an khingpui inhnehtawkpuiin vawi kua chiah a tlawm. 

Barcelona hian zanin dar 1:15-a Real Valladolid an mikhual leh dawn a, La Liga-ah hma hruai mekin anmahni hnaih bertu Real Madrid aiin point rukin an sang fal mek.