Aizawlah Bagan nen Khalid Jamil a lo kir

Kum 2017 I League-a Aizawl FC champion puitu Khalid Jamil chuan a club thar Mohun Bagan nen Aizawl a rawn thleng leh ta - vawiin chawhnu dar 2:00 hian Aizawl FC nen league match an khel ang.

Khalid hian Aizawl FC a chhuahsan hnuah East Bengal chu RG Stadium-ah a rawn hruai tawh a, khelmual chhung leh pawnah boruak a sang hle - Khalid erawhin he thil thleng hi sawi nawn a duh lo. 

Mumbai FC aṭanga hriat hlawh coach chuan, "Aizawla ka lo kir leh thei hi ka lawm a, thil thleng tawh chu thil thleng tawh a ni a, sawi nawn fo a ṭul lo. Inkhel tur leh point thum hmu tura lokal ka ni," a ti a, hnehna chan a tum ruh hle. 

Aizawl FC coach Standly Rozario-a'n home match-a Mizo club a enkawl hmasak ber turah chak loh a tum bik lo. Indian coach tawnhriat ngah chuan, "Hnehna chan kan tum a, point thum aia hniam kan ngaihtuah lo," a ti.

Aizawl FC-in coach Gift Raikhan bana Standly Rozario an lakluh hnuah home match an la khel leh lo a, Bangalorean coach enkawlna hnuaiah khualmualah match thum khelin point li an hlawh chhuak. 

East Bengal leh Mohun Bagan pawh lo enkawl tawh coach hian mahni muala inkhel tur an nih avangin he hun hi ṭha taka hman a duh a, "Player-ten ṭawiawmtu an mamawh avangin mipui tam tak lo kal se la, ennawm hmuh an duh chu kan chhawpchhuah sak ang," a ti.

Aizawl FC hian coach thar hnuaiah table-a 10-na aṭangin pariatnaah hmun an sawn a, Standly chuan an naute chuan inrintawkna an neih leh tak thu a sawi. 

Shillong Lajong boss hlui chuan, "Mizo player-te hian talent ṭha tak an nei a, ka rawn luh laia an tlakchham awmchhun chu inrintawkna a ni. Tunah chuan inrintawkna an nei let a, kan result-in chu chu a hrilhfiah," a ti.

Aizawl FC coach hian Vanglainiin, "Eng formation nge in hman dawn?" tia a zawhna chu, "Kan formation hman apiang chu Mohun Bagan hnehna tur a ni mai," tiin a chhang. 

Mizo club hian hliam vangin Vanlalduatsanga, Lalkhawpuimawia, Albert Zohmingmawia leh Kareem Omolaja Nurain an chhawr thei dawn lo a, hetihlai hian tlarhmaah Ansumana Kromah chu 100% a ni tawh thung. 

Standly chuan, "Ka player-te hi player dang aia an ṭhat loh bikna a awm lo a, an ṭhat theih dan bera chhawrchhuah hi coach hna a ni. Kromah hi 100% a ni tawh a, tlarhnungah Kareem awm lo mah se Richard Kasagga kan nei a, a lungngaih thlak loh," a ti. 

Aizawl FC tan Kasagga leh Kromah an pawimawh dawn tihna a ni a, Bagan hian tlarhmaah Sony Norde, Henry Kisekka leh Aser Pierrick Dipanda an neih avangin tlarhnung tan fimkhur a ngai lehzual ang. 

Mohun Bagan hian tun season-ah beisei an phak bik lo. An duh ang result an neih loh avangin coach Shankarlal Chakraborty a bang a, result neih theih beiseiin Khalid hi an lalut. 

Khalid Jamil hnuaia an match hmasa pahnihah hnehna chang nghal mah se Kolkata derby-ah an tlawm zui a, a hnu match hnihah draw result ve ve bak an hlawh chhuak thei lo. 

Khalid chuan, "Kan champion theih tawh leh tawh loh ka ngaihtuah lo a, a sang thei ang bera season khar kan la tum fan," tiin an hmabak match apianga chak a tum thu a sawi. 

Mohun Bagan hian William Lalnunfela leh Lalchhawnkima chu an club hlui hmachhawn turin an rawn hruai tel a, Mizo club midfielder hlui Yuta Kinowaki erawh hliam vangin a inlan thei lo ang.