Chelsea hlim niah Arsenal an ngui

Arsenal tan Europa League last 16 lut tur chuan Emirates Stadium-ah goal hnih tal an khung a ngai tawh dawn a, Premier League club ṭha Chelsea erawh tlang turin mikhual an thlen hunah goal chhuah loa awm a tawk tawh dawn.

Ningani zan last 32 inkhelah Arsenal hi Bate Borisov khel­mualah 1-0 in an tlawm, Man­chester City laka zawr hlim Blues erawhin an mikhualna ramah Ross Barkley leh Olivier Giroud te goal hmangin Malmo 2-1 in an hneh thung. Second leg hi February 21 hian khelh tur a ni ang.

Borisov Arena-a inkhelah chawlhlawk hma hretin mid­fielder Igor Stasevich-a free kick pet chu Stanislav Dragun-a'n chiang zetin a tauh lut a, goal dang a luh loh avangin Belarus champion hian European competition bikah a vawi khat nan an mikhual English club an hneh theih phah.

Alexandre Lacazette-a'n second half tir lama a goal khung chu pawm sak a ni lo a, French striker hi hun tawp hma deuhin defender Aleksandar Filipovic a nghawk avangin hnawh­chhuah a ni. Ball pos­session 77% zet chang chungin Gunners-in goal zawnah vawi thum bak an pet thei lo.

Europa League vawi thum champion tawh Unai Emery-a'n second leg-ah hna hautak a hmachhawn dawn a, nikum December thla khan FK Qarabag hnehin inelna hrang hrangah a zawnin match 22 an tlawm lo - a hnu lamah erawh match 13 an khelh zinga ṭum ruk an chak lo a ni.

Arsenal manager Unai Emery chuan, "Minute 90 dang kan la inkhel leh dawn a, boruak a danglam tawh hle ang. Tun ṭumah khan hun chanve hmasa lam chu kan khel ṭha a, goal khung theihna hun kan neih erawh kan hlah. Vanduai chang hi a awm thei, kar hmasa a goal kan khungna angah khan a lut lo.

"Kan thawkrim a, ka naute khan an theihtawp an chhuah tih pawh ka hria. Team inlungrual leh thawhhona ṭha tak kan hmachhawn avangin a awlsam lo ve bawk a ni. Tuna kan thil tum ber chu match lehpeka hnehna chan a ni dawn, kan khelmualah chuan min ṭantu fans puihna nen ropui takin kan tho chhuak ang," a ti.

Striker Lacazette-a red card chungchang sawi zuiin, "An chet dan tak kha ka hmu chiah lo, hriat tur erawh chu khelmual chhungah hian kan thinurna kan thunun thiam tur a ni. Match lehpeka kan chhawr thei lo tur hi chanchin ṭha lo a ni a, a pawimawh zawk chu inkhel thei player dangin ṭha takin an khel mai ang," tiin a sawi.

Maurizio Sarri kaihhruaina hnuaiah Chelsea-in tun season chhunga Europa League an khelh tawh chinah hneh loh an la tawng lo, mikhual khelmualah Barkley leh Giroud ten goal an khung hmasak avangin, hun tawp dawna midfielder Anders Christiansen goal khung chu Malmo beiseina siam thartu mai chauh a ni rih.

Italian manager leh a naute hi Etihad Stadium-a 6-0 a tlawm hlim an ni a, kum 28 chhunga an chak loh chian ber ṭum a ni. An match hnuhnung 10 aṭangin vawi li ngawt an tlawm avangin Europa League lamah tal chuan chak an mamawh tak zet - a vawi khat nana knockout round lut Malmo hmaah chak loh hlauhthawnawmah an ding lo.

Chelsea hian January thla­a Juventus aṭanga an hawh Gon­zalo Higuain chhawr thei mah se bench-ah dah a ni a, Arsenal striker hlui Giroud chunga rinna nghattu Sarri-a'n a tisual lo. Giroud hian European com­petition bikah a match hnuhnung paliah goal a klhung vek a ni.

Chelsea manager Maurizio Sarri chuan, "Tharum ngah tak mai nen kan inhmachhawn a, ka hmuh dan chuan kan khel ṭha thawkhat. Set piece-ah kan talbuai lek lek ṭhin a, mahse inkhel kan thunun tluan theih avangin hnehna chan kha kan phu a ni.

"Match hnuhnung bera kan dinhmun ngaihtuah chuan tuna kan result hi a lawmawm, boruak rit tak kara leng mek kan nih avang­in a awlsam lo. Tihsual zauh kan neih avangin goal khat kan chhuah, amaherawhchu minute 90 chhung khan tihsual kan nei tlem a, a lehpekah chuan tun aiin a ṭha lehzual ang," tiin a sawi.

Napoli manager hlui chuan sawi zawmin, "Match tinah rilru leh tihtak zeta kan khelh chhunzawm a ngai, a changa khelh ṭhat vak a, a hnu lawka talbuai leh ṭhin ang hi kan kalsan a ngai," a ti a, Blues captain Cesar Azpilicueta pawhin league lama thlen san an ngaihpawimawh tluk zetin Europa League nomawi chawi an duh thu a sawi bawk.

Inter Milan chuan an captain Mauro Icardi chhawr thei lo mah se Lautaro Martinez-a penalty hmangin Rapid Vienna 1-0 in an luhchhuah a, round sang zawk lur thei turin an dinhmun an sawh nghet.

Argentine striker Icardi hian 2021 thleng daih contract a nei mek a, tunah hian contract chungchangah inbiakna neih mek a ni. Club leh player inkar a ṭha tawk lo a, hei vang hian Austria-ah pawh a zin ve lo - Italian club hian goal keeper Samir Handanovic chu team captain a nih thu an puang ve nghal a ni.

Scottish club Celtic chu an mikhual Valencia lakah 2-0 in an tlawm a, club ṭha pahnih inkhelah Italian team Lazio chu an mikhual La Liga club lakah 1-0 in an tlawm ve bawk.