Hamilton-a'n season thar a nghakhlel

Formula 1 driver champion lai Lewis Hamilton chuan season thar a nghakhlel tawh tih a sawi a, Britain tlangval hian Mercedes chu team dang chunga leng turin an la ṭhat tawk a beisei thu a sawi bawk.

Tun hnaiah F1 team dangin Mercedes an elphak lo hle. Kuminah erawh Ferrari leh Red Bull ten nasa takin hma an sawn tura beisei a ni a, hei vang hian driver leh team champion an nihna humhim pawh a awlsam lo mai thei.

World champion vawi nga ni tawh Hamilton chuan, "Hlawhtlinna tam zawk chan belh ka duh, rim taka thawk chhunzawmin hmalam pan ka duh a, ka elpui te bei let turin ka inpeih leh tawh hle," tiin a sawi.

Kum 34 mi Hamilton hian 2014 hnu lama intlansiak a hmachhawn 100 aṭangin vawi 51 ngawt hnehna a chang thei a, season hnuhnung panga zinga vawi li ngawt a champion theih bawk avangin kuminah pawh rinkai a ni - driver ropui berte huangah zuang lut tawhin, champion hnem ber Michael Schumacher (7titles) pawh a hlat tawh lo.

Car intlansiakna sang ber F1 hi March 15-17 chhung hian tun season chhunga a hmasa ber atan Australian Grand Prix tlan a ni dawn a, a hnuhnung ber atan November thla tawpah Abu Dhabi Grand Prix an tlan ang.