Player langsar an chak tlang
83rd Yonex-Sunrise Senior Badminton National Championship khelh mekah tun hma lama nomawi lo chawi tawh Saina Nehwal, Parupalli Kashyap leh Sourabh Verma te chuan semifinal an lut vek.
Nimina quarterfinal inkhelah champion lai Saina hian India number 1 hlui Neha Pandit chu 21-10, 21-10 in a hneh a, London Olympic bronze medalist hian awlsam takin hnehna a chang angin lang mah se Mumbai nula lakah hian vanneihna a mamawh tel.
Commonwealth Games vawi hnih champion tawh Saina hian kum 22 mi Vaishnavi Bhale a hmachhawn leh ang, Nagpur nula hi season hmasa khan India tan Uber Cup squad-ah a tel phak a, awlsam taka paltlang theih a ni bik lo ang.
Mipa singles lamah 2012 champion Kashyap chuan Bodhit Joshi lakah 21-18, 21-16 in hnehna a chang. World number 6 hlui hian a match lehpekah Lakshya Sen a hmachhawn leh dawn thung a ni.
Inelna neihna hmun TRP indoor stadium chu a ṭha tawk loa an ngaih avangin Saina leh Kashyap ten Nilainia an match hmasa ber tur an khel nghal duh lo a, Assam Badminton Academy chuan an siamṭhat hnuah player pahnih hian an match hmasa an khel chauh.
Inkhel dangah world number hlui 30 Sourabh chuan harsa takin B. Sai Praneeth chu 21-11, 21-23, 21-18 in a hneh. Sourabh hian tun hmain Super 100 titles pahnih Russia Open leh Dutch Open te a la tawh a, a khelh ṭhat ni chuan player langsar dang pawh hneh thei turin theihna a nei.
Senior Badminton National Championship-ah hian Rio Olympic silver medalist PV Sindhu pawh a inlan a, champion tura rinkai Sindhu hian a match hmasa berah hnehna changin nizan khan match hnihna a khel leh a, he thu buatsaih lai hian result kan hre hman lo.