James-a'n NBA team neih a duh

LeBron James chuan basketball a khelh tawh loh hnuah pawh a infiamna ngainat ber hi chhuahsan mai a tum lo, American star hian engtik hunah emaw chuan NBA team neih ve ngei a duh thu a sawi chhuak.

Kum 34 mi James chuan,"A thleng lo mai thei, mahse ka duh avangin ka tum dawn," tiin NBA team neih a chak thu a sawi. Tun hmain Michael Jordan chuan Charlotte Bobcats a lei tawh a, James hian team a nei ve leh a nih chuan NBA player ni tawh zinga hetiang ti thei pahnihna a ni ang.

NBA champion vawi thum ni tawh James hi Forbes-in a tarlan dan chuan NBA player zingah a kum zawnin vawi nga ngawt sum lalut hnem ber a ni mek a, club aṭanga a hlawh bakah court pawn lama mimal sum hmuh theihna hrang hrang aṭanga a lakluh a ni.

Tuna a khelh mekna Los Angeles Lakers pre­sident Magic Johnson chuan, "LeBron hi midang chunga leng a ni a, NBA hian neitu thar a nei dawn a nih chuan ani hi chutiang mi tur dik tak chu a ni," tiin a sawi.