FA Cup fifth round Manchester City tan quarterfinal kawng a awl

Khawvela football inelna upa ber FA Cup fifth round-ah team ṭha zingah dam an tam tawh lo a, chutihrualin Premier League leh League Cup champion lai Manchester City an la dam. Pep Guardiola hote hian zanin dar 11:00 hian League Two club Newport County an hmachhawn dawn a, quarterfinal an luh ngei a rinawm.

Manchester City hian fifth round thleng tur hian Championship club Rotherham United chu 7-0 in an hneh a, Premier League club Burnley 5-0 in an sawp leh bawk. An khingpui tur Newport erawhin Metropolitan Police (2-0), Wrexham (0-0, 4-0), Leicester City (2-1) leh Middlesbrough (1-1, 2-0) te an hneh a, replay vawi hnih an khelh avangin match ruk lai an khel tawh tihna a ni.

Newport hian non league club tih loh chu an mualah vek an hneh a, Manchester City an mikhualna tur Rodney Parade hi an hman thiam avangin thilmak thlentir an tum ang. Amaherawhchu an khelh tawhna leh an player neih dan thlir chuan League Two club hian anmahni muala an khelh dawn avangin an chak ang tih lam ai chuan goal an chhuah tlem hlek ang tih a kawk zawk.

Manchester City hian inhliam vangin keeper Claudio Bravo, Vincent Kompany leh Benjamin Mendy te an chhawr thei dawn lo a, Spanish manager erawhin inhliam ai mahin Nilaini zana Champions League Last 16-a Schalke an khelh tur a ngaih pawimawh zawk a rinawm.

Arsenal leh Chelsea lama hattrick siam thei Sergio Aguero an dah ṭhat a rinavwm a, chutihrualin tun hnai lama league lama chhawr tam loh zingah Leroy Sane leh Gabriel Jesus te an la awm tho avangin Newport tlarhnung tan chuan cho loh val vek an la ni thei ang.

League Two club tana chanchin hriat nuam erawh Manchester City-in FA Cup-a anmahnia aia league hnuai zawka awm khualmuala an khelh hnuhnung parukah vawi khat chauh an chak a, nikum khan fifth round-ah Wigan Athletic lakah 1-0 in an tlawm.

Frank Lampard-a enkawl Derby County chuan zanin dar 6:00 hian Brighton & Hove an tlawh dawn a, Premier League club hian hrem vangin Florin Andone leh hliam vangin Solly March an chhawr thei dawn lo.

Derby manager Lampard hian a inkhelh hun laiin Chelsea chu FA Cup nomawi vawi li a chawipui a, Championship club nen erawh quarterfinal thlen ringawt pawh hlawhtlinna a ni thei ang.

Premier League club Crystal Palace pawhin Keepmoat-ah Doncaster Rovers an tlawh dawn a, League One club manager Grant McCann chuan, "Premier League club an nih avanga goal venhim kan tum ringawt nghal ngawt chuan a hlauhawm ang. Chuvangin kan khelh dan ṭhin ang thoin kan khel ang a, a ṭha a nih chuan a ṭha a ni mai ang a, a ṭha lo a nih pawhin a ṭha lo a ni mai," tiin Pathianni zan an inkhelah risk an lak tur thu a sawi.

Wolverhampton pawhin Aston Gate-ah Bristol City an hmachhawn dawn a, Championship club Bristol hian third round-ah Premier League club Huddersfield an hneh tawh a, Wolves hneh nawn an tum dawn a ni.