Joshua aia Fury dahsangtu Miller

June 1-a Anthony Joshua nena inhmachhawn tur Jarrell Miller chuan a khingpui tur ai chuan Tyson Fury chuan champion 'hmel' a put zawk thu a sawi a, Anthony Joshua a hlau lo. 

Miller chuan, "Ka hmuh danah chuan Fury hian ring chhung leh pawn lamah hna ropui tak a thawk a, hun harsa tak paltlangin tun dinhmun hi a thleng thei a ni. 

"Heavyweight boxer pakhat (Fury sawina) chu rilru lam harsatna avangain a tlusawp a, mahse huaisen takin a tho leh. AJ hian chutiang a tih ve awm ka la hre lo," a ti. 

Kum 30 mi Miller hian vawi 24 inhnek a hmachhawnah vawi 23 hnehna changin vawi khat a khingpui a inhnehtawkpui a, mahse boxer langsar tia sawi tur a la hmachhawn ngai loh avangin Joshua lakah chak tura beisei a ni lo. 

Miller ngaihdan erawh a dang thung. American boxer chuan, "AJ ka hneh hunah chuan zan khat thil thu-ah mi ropui tak ka ni dawn a ni," a ti a, "Indonaah hmangaihna a tel a thiang lo a, ka chak theih nan tih tur ṭul apiang chu ka ti mai ang," tiin Joshua hneh a tum ruh hle.