Atletico tan Diego Simeone a rinawm

Argentine coach ṭha Diego Simeone chu club dang tam tak nen sawizawm a ni reng chungin Atletico tan rinawmna thu a tiam nawn a, kum 2022 thleng cham turin contract thar a ziak. 

Atletico chuan Diego Simeone hlawh zat tur hi tarlang chiah lo mah se a lam hnai tak pakhat chuan kum khata pound maktaduai 20 hlawhtu, Atletico player hlawh hnem ber Antoine Griezmann aiin a hlawh hnem hret dawn niin a sawi a, a squad neih laia player-te chu a remtihna loa hralh lo turin an inrem bawk. 

Kum 48 mi manager hian kum 2011 khan Atletico coach dinhmun hi a chelh ṭan a, La Liga manager zingah club ngai enkawl rei ber a ni mek. 

Club hausa Barcelona leh Real Madrid che vel karah Simeone enkawl Atletico hi team hnawksak an ni ve thei reng a, 2014 khan La Liga nomawi chawiin Europa League-ah vawi hnih a champion pui bawk.

Champions League bikah 2014 & 2016 khan final a hruai thleng a, mahse Real Madrid lakah a tlawm ve ve a, 2013 khan Copa del Rey nomawi a chawi bawk a, La Liga coach of the year-ah ṭum thum thlan a ni. 

La Liga-a pathumna dinhmun luah mek Atletico hian Pathianni zan dar 8:45 hian league match khel turin Villarreal an mikhual ang.