Semifinal-ah Simona Halep

Qatar Open khelh laia seeded pakhatna Simona Halep chuan Julia Gorges chu straight set a hnehin semifinal a lut a, champion tura rinkai Angelique Kerber pawhin set a hloh hnuah hnehna chang letin quarterfinal a paltlang ve bawk.

Ningani zan inkhelah world number 3 Halep hian Germany nula Gorges hi 7-6 (7-1), 7-6 (8-6) in a hneh, set hnih an khelh chhungin inhnehtawk viau mah se Romanin nula zawkin a pawimawh hunah tak zel point a hmuh theih avangin a dingchang.

Kum 27 mi Halep hian a match lehpekah chuan Elina Svitolina a hmachhawn dawn, Svitolina hian WTA Premier quarter finalist Karolina Muchova chu 6-4, 6-2 in a lo hneh ve bawk a ni.

Quarterfinal a thlen chiah khan Halep hi kar leha ranking chhuak tharah pathumna aṭangin pahnihnaah a kaisang dawn tih a chiang tawh a, mahse a champion a nih pawhin hnungzâng na vanga inlan lo Naomi Osaka chu a la lehpel thei rih dawn chuang lo.

Inkhel dangah Grand Slam vawi thum cham-pion tawh Kerber-i'n Czech Republic player Barbora Strycova chu 1-6, 6-2, 7-6 (7-4) in a hneh, world number 1 hlui hian 6-4, 6-3 a Kiki Bertens hnehtu Elise Mertens a hmachhawn leh ang.

Hnehna changtu Kerber chuan, "Ka khingpui kha a ball vuak a nain a che rang em em a, kan inhnehtawk em avang khan ka chak zawk ang tih pawh ka beisei ngam bik lo. A tawpah chuan point hnih lek khan inkhel result a siam danglam ta a ni," tiin a sawi.