Kolkata khawpuia Shillong mualphotu Sialhawk Express

East Bengal chuan Ningani zan khan an mikhual Shillong Lajong chu 5-0 in an sawp a, he inkhela langsar ber chu Mizo tlangval R. Laldanmawia a ni. 

Sialhawk Express tia hminglem an pek Danmawia hian goal thum a khung a, I League-a hattrick a siam hmasak ber a ni - tun season I League-ah goal sarih a khung tling ta bawk.

Danmawia bakah hian Jobby Justin leh Enrique Esqueda te chuan goal khat ve ve an thawh bawk a, Shillong Lajong lamin a chhanletna tur an neih loh avangin an mualpho haw.

Sialhawk Express

East Bengal hian an goal hmasa ber khung turin an nghah rei a ngai lo. Lalrindika Ralte corner pet aṭanga ball kal chu Danmawia'n lo chang fuhin Lajong goal-ah a tauh lut a, he goal-a luh hian minute riat chauh a la ni. 

Minute 19 a liam a, Danmawia bawk kan hmu nawn. Mizoram Premier League chhul chhuak forward hian Borja Gomez hnen aṭanga a ball hmuh chu ṭha zeta a lak thlak hnuah Lajong keeper Phurba Lachenpa man phak lohin a pet lut a, goal mawi bik zinga chhiar tel inthlahrunawm a ni lo. 

Danmawia'n goal hnih a khung hnuah Jobby Justin leh Esqueda ten goal an khung ve leh a, minute 61-naah Danmawia'n a goal thumna a khung - chiang takin East Bengal an chak a, champion an sawi ri leh ta. 

Mizo hmel a ṭha!

R. Laldanmawia'n hattrick a siam a, hetihrual hian Lalrindika Ralte hming lam hmaih a thiang lo bawk - East Bengal captain hian goal hnih a siamsak.

Danmawia goal hmasa ber hi Didika corner pet Sialhawk tlangvalin a lo tauh luh a ni a, Lunglei tlangval Didika hian long ball hmangin Mexican striker Enrique Esqueda goal khung tur a siamsak leh bawk. 

Shillong Lajong lakah hian Lalramchullova chuan inkhel bul a ṭan bawk a, Brandon VL Remdika chuan bench lamah hun a hmang thung - Lajong tan F. Lalrohlua a inlan.

Hmabak

East Bengal hian Lajong an sawp leh tak avangin hmahruaitu Chennai City chu match khata khel tlem zawk chungin point thum chauhin an phak lo tawh a, champion beiseina a sang sawt ta hle. 

Pathianni tlai dar 5:00-ah Kolkata club hian league match an khel leh dawn a, champion beisei zinga mi Churchill Brothers an mikhual ang. 

Lajong-in table mawngphah an luah chhunzawm zel a, Thawhṭanni tlai dar 5:00-ah hmahruaitu Chennai City an mikhual zui dawn avangin an hmabak hi a awlsam lo hle.