Match 350 chak thei Roger Federer

Wimbledon match thum a khel a, set khat chauh hlohin a khingpui a hneh vek, seeded pahnihna Roger Federer tan chawlhkar duhawm tak a ni. Swiss star hian Grand Slam match 350 zetah hnehna a chang ta a, tennis player zingah inelna lianah a chak hnem ber.

Mipa singles champion tura rinkai Novak Djokovic, Rafael Nadal leh Federer ten last 16 an lut vek a, rawlthar beiseiawm rual tla tawh mah se inelna hlutna a tlakhniam phah lo. Season dang ang bawkin Wimbledon chawlhkar hnihna a hmuhnawm dawn - zanin aṭangin last 16 khelh ṭan tur a ni ang.

Centre Court-ah Roger Federer aia lawm hlawh an awm ngai lo a, Inrinni zanah seeded 27-na Lucas Pouille nen darkar hnih leh minute ruk an inkhel pawh fans lamin an en kham lo tih a chiang - vawi riat champion tawh hian 7-5, 6-2, 7-6 (7-4) in hnehna a chang. Zaninah Matteo Berrettini nen an inhmachhawn leh dawn.

Kum 37 mi Federer hian Jimmy Connors-a record khumin Grand Slam-a chak hnem ber a ni ta a, hnehna a chan zinga 98 hi grass court inelna lianah niin Wimbledon-ah hian season 17 nan last 16 a inhlangkai chiah, hei pawh hi record thar a ni nghal bawk.

Grand Slam vawi 20 champion tawh Federer chuan, "Tun ang kum tawhah inelna liana ṭha taka ka la khel thei hi ka lawm hle. Season tir khan grass court inelna ka thlurbing tur thu ka sawi tawh a, ka duh leh beisei ang ngeiin ka khel ṭha rih hle a ni," tiin a sawi. Novak leh Rafa te an la awm avangin ngaihṭha taka awm theih a la nih loh thu a sawi bawk.

Grass court a nih chuan Rafael Nadal-a'n en kan a hlawh deuh fo a, kuminah erawh boruak nei lian ber a ni mek. Spanish tlangval hian French player Jo-Wilfried Tsonga 6-2, 6-3, 6-2 in a hneh, hnehna chang tur hian darkar khat leh minute 48 bak a mamawh lo.

Wimbledon vawi hnih champion tawh Nadal leh Tsonga te hi All England Club-ah an vawi khat intawnna a ni a, a khingpui hi break point hmuhtir miah loin a hneh thei - zaninah Joao Sousa a hmachhawn leh dawn. Portuguese player hian inkhel dangah khawtual tlangval Dan Evans chu a lo vaw tla ve thung a ni.

Kum 33 mi Nadal chuan, "Tsonga hi player ṭha tak a ni, forehand leh backhand a nei ṭhain a hlauhawm thei hle. Amaherawhchu, vanneih thlak takin ka khelh ṭhat tluan vanglai a ni a, a chak zawkah ka ṭang. Kan point en mai chuan a awlsam angin a lang, mahse a nihna takah chuan set tin mai kha a awlsam lo vek," tiin a sawi.

Roger Federer leh Rafael Nadal te angin a thawm a na tawk lo a ni mai thei. Mahse, seeded pakhatna Novak Djokovic chu inelna dang a hmachhawn ṭhin dan ang bawkin nghet takin a kaltluang hle - Hubert Hurkacz chu 7-5, 6-7 (5-7), 6-1, 6-4 a hnehin a thiam 16 zingah a inhlangkai.

World number 1 Djokovic-a'n break point vawi 17 a hmuh zinga pali chauh a chhawr ṭangkai thei a, nidang ang chuan a khel ṭha tawk lo. Amaherawhchu, Serbian tlangval hi set hnuhnung pahnihah erawh nuamsa takin a tlang, fourth round-ah chuan Felix Auger Aliassime hnehtu Ugo Humbert nen an inhmachhawn leh ang.

Kum 32 mi Djokovic chuan, "Hurkacz kha kum 22 mi chauh a la ni a, a huaisenin min bei na thei hle. A ball vuak a dik a, a service a ṭhain a ball rawn vuak letna hmun a ṭha thei em em bawk, player chhuak thar zingah hian hmabak nei êng tak tak an awm nual," tiin a sawi.