UFC 239: Jones & Nunes an dingchang

Mipui nghahhlelh UFC 239-ah nimin khan Jon Jones leh Amanda Nunes ten an kawnghren kawl lai an humhim ve ve a, UFC-a knock­out rang ber Jorge Masvi­dal chuan a lantir bawk. 

T-Mobile Arena-a fight ngaihven hlawh berah Jones hian 47-48, 48-47, 48-47 in amah chotu Thiago Santos a ngam a, minute 25 chhung fight-in mipui mit a ti tlai. Light heavyweight kawng­hren a kawl lai hum­himtu Jones chuan, "Thiago tan min hneh tur chuan knockout a ngai tih a chiang a, mahse fimkhur taka khelin ka chhungte leh team tan gold ka hawn leh ta a ni," a ti. 

Kum 31 mi fighter chuan a khingpui hi fak zuiin, "Thiago kha a ṭha takzet a, ka beisei phak bak a ni. Muay Thai-a black belt a ni a, kei aia kickboxing-a hun hmang rei zawk ka hneh avangin ka inchhuang hle a ni," a ti a, a khingpui a dah sang thiam hle. 

Amanda Nunes chuan hmeichhe fighter ngaihven hlawh a nih chhan a pholang a, UFC hmeichhe fighter ropui ber ang hiala ngaih fighter hian round khatnaah Holly Holm chu technical knockout hmangin a hneh. Kum 31 mi Nunes hian Holm a hneh leh tak avang­in bantamweight leh feather­weight-a lo champion tawh fighter chu a hneh kim vek tihna a ni nghal. 

Holm hi kum 2015-a head kick hmanga Ronda Rousey knockout tu kha a ni a, Nunes hneh turin beiseina a nei sang hle. Mahse, Brazilian fighter Nunes tawh a khirh a, "Holm hi champion hlui zinga ka la hneh loh awmchhun a ni a, tunah chuan ka tum hlenin ka hneh leh ta," a ti. 

Fighter la tlawm ngai lo Ben Askren-a'n mualpho takin a 'record' ropui a hloh a, welterweight fight-ah Jorge Masvidal chuan zuang chunga a khup hmanga doin a knockout! Kum 34 mi Masvidal hian second nga chhungin Askren hi a knockout a, vawi 47 fight a hmachhawnah a khingpui a knockout vawi khatna a ni.