Zaninah CYMA Football Last 16 draw neih a ni dawn
Suzuki Gixxer SF 250 20th Inter Branch YMA Football Tournament Last 16 lut tur chu vawiin hian a hriat kim dawn a, zanin dar 8:00 hian CYMA Hall, Tuikhuahtlangah 'Last 16 Tie Draw' neih a ni dawn.
Tie Draw-naah hian branch aiawh mi paruk bakah coach, manager leh captain kal tur a ni a, captain hian jersey hak tur niin Tie Draw hi Zonet leh LPS-ah live-a pekchhuah a ni ang. CYMA Football-ah Armed Veng, Bawngkawn, Chanmari, ITI Veng, Lungchhuan, Ramhlun North, Tuithiang leh Zawlnuam Bawrai ten Last 16 an lut tawh a, vawiin hian team riat dang a hriat leh ang.
Tla tawh zingah team langsar an awm nual. Chungte chu Leitan, Electric Veng, College Veng, Chhinga Veng, Aizawl Venglai leh Hualngohmun te an ni. Leitan hi tun hnaia an ṭhat ber ṭum ni mah se an match hmasa berah Phulpui an hneh lo.
MPL club nei Electric Vengin Zawlnuam Bawrai hneh loin an tla a, College Veng pawh champion thei tur khawp player nei mah se anmahni ang bawka team ṭha Armed Veng an hmachhawn avangin an vanduai. MPL club nei Chhinga Vengin anmahni ang bawka MPL club nei Ramhlun North an hneh lo a, Chhinga Veng hi team ṭha zawk an ni a, Ramhlun North nen an inhal tih hi a dikna chen a awm.
Seeded team zinga mi Aizawl Venglai erawh an ṭhat ṭum a ni lo a, an tla hi a mak hran lo. Tun hnaia hmasawn Hualngohmun pawh kumin NECS Cup aiin an squad chhah zawkin lang mah se Lungchhuan lakah an chak lo. Kum 2011 Census-a a lan dan chuan Lungchhuanah hian chhungkaw 138 chauh an an awm a, an khaw mipui pawh 710 an ni. Serchhip District chhunga khaw lian lo ve tak Lungchhuan hian team 140 telna CYMA Football-ah Last 16 an inpetling a, an khaw ṭhenawm Sialsir, Chekawn, N. Vanlaiphai, Mualcheng, Khawlailung, East Lungdar, Lungkawlh, Piler, Leng, Sailulak leh Bawktlang lakah an hawisan phah khawp ang.
Inkhelh Hun
Round of 16 July 10-13, 2019
Quarterfinal July 15-16, 2019
Semifinal July 18, 2019
Final July 20, 2019
Champion Rs 1,00,000/ + Trophy+ Medal
Pahnihna Rs 50,000/- Trophy+ Medal+Certificate +Participation Prize
Semifinalist Rs 10,000 each
Quarterfinalists Rs 5,000
Fair Play Team Rs 10,000 + Trophy
Best Player Rs 2,500 +Trophy
Top Scorer Rs 2,500 +Trophy
Best Fans Bucket Lian