ATK ngamtu Bengaluru an chak

Indian Super League semifinal first leg-ah Bengaluru chuan 1-0 in ATK an hneh a, final lut turin pen khatin an pen hnai hret. 

Sree Kanteerava Stadium, Bengaluru-a inkhelah Deshorn Brown chuan goal awmchhun hi a khung a, Kolkata club-in a chhan letna tur an neih loh avangin kut ruakin an haw. ISL semifinal first leg-ah league-a pakhatna leh pahnihna an tlawm ve ve a, final-ah pathumna leh palina an inhmachhawn lo ang tih a sawi theih loh. 

Bengaluru-in mahni home-a khel an ni tih an inhria a, chak loh an duh loh. Minute 31-naah goal hmahruai an khung a, mahse an goal khung hi vanneih goal tia chhiar theih a ni. 

Defender Juanan-a shot ho tak anga lang chu ATK goalkeeper Arindam Bhattacharja chuan a man nghet zo lo a, a per lehlam hi Brown chuan harsatna nei loin goal-ah a chantir. Jamaica international hlui Brown hian minute 11 hnuah goal dang khungna chance pawh a nei a, mahse ATK defender rual a paltlang hnuah a hun ṭha neih goal-ah a chantir thei lo. 

Kolkata club-in first half-ah si phurh sutna remchang nei ṭhin mah se an chhawr thei lo a, Bengaluru-in second half ṭantira Sunil Chhetri hmanga an hun ṭha neih an ui ve khawp ang. 

Second half-ah Bengaluru-in goal venhim a ṭul tih an hria a, goal nawr aiin tlarhnung venhim an ngai pawimawh zawk. ISL-a tlarhma hmuhnawm ber pawl David Williams leh Roy Krishna-te meuh pawhin Bengaluru tlarhnung an su hawng hleithei lo a, Bengaluru midfield roreltu Erik Paartalu chu fak phu a ni. 

Hun tawp nan minute ruk chauh a awm tawh a, ATK-in si phurh sutna remchang an nei - tlarhmaah Roy Krishna a tlan fal a, mahse Nishu Kumar chuan a tih tur dik tak tiin a ti tlu. 

Referee-in Nishu Kumar hi a hnawt chhuak - mahse a tih tluk hi tun season ISL-a goal 14 khunga assist vawi nga nei tawh Krishna a ni a, foul lo se goal a khung ngei a rinawm. Nishu hian a tih tur dik tak a ti. ATK vanduai zan a ni hrim hrim a, team pahnihin goal an khung loh laia David Williams-a goal khung chu handball vangin pawmsak a ni lo bawk.